لە توێژینەوەیەکدا کە لە ڕۆژنامەی JAMA Pediatrics بڵاوکراوەتەوە، بەپێی زانیارییەکانی سەنتەری نیشتمانی ئاماری تەندروستی (NCHS) مردنی کۆرپەلە هەندێک جار پەیوەندی بە قەڵەوییەوە هەیە.
توێژینەوەکانی پێشوو دەریانخستووە کە قەڵەوی لە کاتی دووگیانیدا دەتوانێت ببێتە هۆی زیادبوونی مەترسی مردنی کۆرپەلە بە گشتی، لەگەڵ کۆمەڵێک کێشەی تەندروستی دایکان و منداڵان. بەڵام تا ئێستا لێکۆڵینەوەیەکی کەم سەبارەت بە پەیوەندی نێوان قەڵەوی لە کاتی دووگیانی و مردنی لەناکاوی چاوەڕواننەکراوی کۆرپە (SUID) کراوە.
بۆ زانیاری زیاتر دەربارەی ئەگەری SIDS و ڕێژەی قەڵەوی لە کاتی دووگیانیدا، تیمی توێژینەوەکە داتاکانی سەنتەری نیشتمانی بۆ ئاماری تەندروستییان هەڵدایەوە بە گرنگیدان بە مردنی کۆرپە لە ساڵانی ٢٠١٥ تا ٢٠١٩.
توێژەران هەموو داتاکانی لەدایکبوونی زیندوویان لە ٢٨ هەفتەی دووگیانی یان دوای دووگیانی شیکردەوە و تا ٣٦٤ ڕۆژ دوای لەدایکبوون بەدواداچوونیان بۆ کرد، پاشان تیمەکە مردنی کتوپڕی چاوەڕواننەکراوی کۆرپەیان لە منداڵانی دایکانی قەڵەو بەراورد کرد لەگەڵ مردنەکانی هەمان بارودۆخ لە منداڵانی دایکانی لەش ڕێک.
بۆیان دەرکەوتووە کە لە کۆی ١٩ ملیۆن منداڵ کە لە ماوەی توێژینەوەکەدا لەدایک بوون، ١٦ هەزار و ٥٤٥ منداڵیان بەهۆی مردنی لەناکاوی چاوەڕواننەکراوی کۆرپە گیانیان لەدەستداوە و لەو ژمارەیەش ٥.٤% بەهۆی قەڵەوی دایکانەوە بووە لە کاتی دووگیانیدا، ڕێژەکەش وەرگێڕدراوە بۆ ٠.٧٤ لە هەر هەزار لەدایکبوونێک.
هەروەها توێژەران ئاماژەیان بەوە کردووە کە دایکانی قەڵەویش لە کاتی دووگیانیدا و بەتایبەتتر لەکاتی خەوتندا زیاتر تووشی نەخۆشی تەنگە نەفەسی دەبن.
توێژینەوەکانی پێشووتر دەریانخستووە کە وەستانی هەناسەدان لە کاتی دووگیانیدا دەبێتە هۆی دروستبوونی چەندین کێشەی تەندروستی پەیوەست بە دووگیانی، و دەتوانێت کاریگەری نەرێنی لەسەر گەشەکردنی کۆرپەلەش هەبێت.
تیمی توێژینەوەکە پێشنیاری ئەوە دەکەن کە لێکۆڵینەوەی زیاتر ئەنجام بدرێت سەبارەت بە زیادبوونی مەترسی مردنی چاوەڕواننەکراوی کۆرپەلە بەهۆی بەردەوامی بەرزبوونەوەی ڕێژەی ژنانی قەڵەو لە کاتی دووگیانیدا.
