بەڕێوەبەرایەتی بەرگرى شارستانیی هەولێر بڵاویکردەوە، ئێوارەی ئەمڕۆ شەممە تيمەكانى ژێرئاوى قەزای خەبات تەرمى ئەو مێردمنداڵەیان دۆزییەوە كه دوێنێ بەھۆى بەركەوتنى بەلەمێك لە خەبات بریندار بوو و دواتر خنکا.
ڕۆژی هەینی لە خەبات بەهۆی بەرکەوتنی بەلەمێکەوە مێردمنداڵێک بریندار بووە و بەهۆی برینداربوونیەوە کەوتۆتە ناو ئاوەکەوە و خنکاوە.
ئەمەش لەکاتێکدایە تەنها لە دوێنێدا لە چوار ناوچەی جیاوازی هەرێم چوار کەس خنکاون.
لەگەڵ هاتنی وەرزی هاوین و گەرما هاووڵاتیان ڕوو لە ناوچە گەشتیارییەکان و دەریاچەکان دەکەن بۆ بەسەربردنی کات و خۆفێنکردنەوە، سەڕەڕای هۆشیارکردنەوەکان و دانانی تابلۆی تایبەت بە شوێنی مەلەکردن و ئاگادارکردنەوەکان لەو ناوچانەی مەلەی تێدانەکرێت، بەڵام ساڵانە چەندین کەس دەخنکێن و هەندێکیشیان تەرمەکانیان نادۆزرێتەوە.
