ئەمریکا، ١٢ کەشتی جەنگی و ٤ هەزار سەرباز لە ڕۆژهەڵاتی ناوەڕاست بڵاوە پێدەکات.
پاش هەڵکشانی گرژییەکان لە دوای تیرۆرکردنی ئیسماعیل هەنیە، بەرپرسی مەکتەبی سیاسی بزووتنەوەی حەماس لە تاران و فواد شوکر فەرماندەی سەربازیی حزبوڵڵا لە بەیروت، ئەمریکا ١٢ کەشتی جەنگی لە ڕۆژهەڵاتی ناوەڕاست جێگیر دەکات.
بەرپرسێکی پنتاگۆن بە واشنتۆن پۆستی ڕاگەیاندووە، کەشتییە تێکشکێنەرەکانی ئەمریکا لە ناوچەی کەنداو و ڕۆژهەڵاتی دەریای ناوەڕاست جێگیرن، لەنێویاندا کەشتیی فڕۆکە هەڵگری USS Theodore Roosevelt و تیمەکانی هێرشبەری دوورخراوە و زیاتر لە ٤٠٠ سەرباز و دەریاوان هەن.
بەگوێرەی ئەو زانیاریانەی ڕۆژنامەکە بڵاوی کردۆتەوە، ژمارەیەک کەشتی جەنگی دیکەی ئەمریکا لە دەریای سوور جێگیر دەبوو، کە ئۆپەراسیۆن دژی حوسییەکان لە یەمەن ئەنجام دەدەن، هەندێکیش ئاڕاستەی کەنداو و دەریای ناوەڕاست کراون، ئەمەش لەبەر ڕۆشنایی پەرەسەندنی گرژییەکان لە ناوچەکەدا.
لە لایەکی دیکەوە ڕۆژنامەی یەدیعۆت ئەحرۆنۆتی ئیسرائیلی بڵاویکردووەتەوە، ئیسرائیل، لە ڕێگەی ناوبژیوانانی ڕۆژئاوا و ناوچەییەوە هۆشداری داوەتە حزبوڵڵا کە هەر هێرشێکی بەرفراوان بۆ سەری دەبێتە هۆی جەنگێکی یەکلایی کەرەوە.
