سەدان دۆنم ڕەز و باخ و پووش و پاوان سووتان و پۆلیسی دارستانی سلێمانیش دەستگیرکردنی تۆمەتبارێکی ڕاگەیاند.
ئەمڕۆ دووشەممە، پۆلیسی دارستان و ژینگەی پارێزگەی سلێمانی ڕایگەیاند، 100 دۆنم ڕەز و باخی هاووڵاتییان و 600 دۆنم پووش و پاوان لە سنووری گوندی گەڵاڵەی سەر بە قەزای ماوەت سووتان.
ڕوونیشیکردەوە کە دوای هەوڵ و ماندووبوونێکی زۆر ئاگرەکە بە هاوکاری پۆلیسی دارستان و ئاگرکوژێنەوەی قەزای ماوەت و دانیشتووانی گوندی گەڵاڵە کۆنترۆڵ کرا.
هەرچەندە پۆلیسی دارستان باسی لە هۆکاری ئاگرەکە نەکردووە، بەڵام لە سەرەتای ئەم هەفتەیەوە فڕۆکە جەنگییەکانی تورکیا دوو جار دەوروبەری گوندی گەڵاڵەیان بۆردومان کرد و بە هۆیەوە ئاگرێکی بەرفراوان لە ناوچەکەدا کەوتەوە.
لە لایەکی دیکەشەوە پۆلیسی دارستانی سلێمانی ڕایگەیاند لە سنووری گوندی مەرگەی سەر بەناحیەی بنگرد ئاگرێک کەوتەوە و بە هۆیەوە نزیکەی 25 دۆنم پووش و پاوان و نزیکەی 100 داری سروشتی سووتان.
ئەوەشی خستەڕوو کە هاووڵاتییەک بە تۆمەتی هۆکاری ئاگرەکە دەستگیرکراوە و پەڕاوی لێکۆڵینەوەی بۆ کراوەتەوە.
