بە هۆی هەڵکشانی مەترسییەکان لە پەرەسەندنی گرژییەکانی ڕۆژهەڵاتی ناوەڕاست، نرخی نەوت لە بازاڕەکانی جیهاندا بەرزبووەوە.
ئەمڕۆ دووشەممە، لەگەڵ کردنەوەی بازاڕەکانی جیهاندا نرخی نەوت کەمێک بەرزبووەوە و بەشێک لە زیانەکنی هەفتەی ڕابردووی قەرەبوو کردەوە، هۆکارەکەشی بۆ پەرەسەندنی ناکۆکییەکانی ڕۆژهەڵاتی ناوەڕاست و بە تایبەتیش ئەگەری وەڵامی ئیسرائیل بۆ ئەو هێرشە دەگەڕێتەوە کە حزبوڵای لوبنانی کردیە سەر بەرزاییەکانی جۆلان و 12 کەس کوژران.
ئەمڕۆ نرخی بەرمیلێک نەوتی خاوی برێنت بۆ 81 دۆلار و 61 سەنت بەرزبووەوە و نەوتی خاوی ئەمریکیش بە 77 دۆلار و 56 سەنتەوە مامەڵەی پێوەدەکرێت.
ڕۆژی یەکشەممەش حکومەتی ئەمنیی ئیسرائیل، بنیامین ناتانیاهۆی سەرۆک وەزیرانی سەرپشککرد لە دەستنیشانکردنی شێواز و کاتی وەڵامدانەوەی هێرشە مووشەکییەکەی سەر جۆلان.
