قائیمقامیەتی سلێمانی ڕایدەگەیەنێت، ڕێگە نادرێت ئاوی دەبە لەشوێنی گەرمدا دابنرێت و بگوازرێتەوە و دەشڵێت: لیژنەیەکی تایبەت چاودێری بەرهەمهێنان و گواستنەوە و هەڵگرتنی ئاوی دەبە دەکات.
قائیمقامیەتی سلێمانی چاودێری کارگەکان و کۆگانی ئاوی دەبە دەکات و ڕێگە نادات لە بەرهەمهێنانەوە هەتا دەگات بەدەستی هاووڵاتیان لەشوێنی پلە گەرمی بەرز و نەشیاودا دابنرێت و بگوازرێتەوە.
سەلار عەزیز، سەرۆکی لیژنەی کارگە و کۆگاکانی ئاو لە لیژنە هاوبەشەکانی قائیمقامیەتی سلێمانی ڕایگەیاند، لیژنەکەمان لە نوێنەری فەرمانگە پەیوەندیدارەکان پێکهاتووە و چاودێری بەرهەمهێنانی ئاوی دەبە دەکەین هەتا دەگات بە دەستی هاووڵاتیان.
وتیشی، “ڕێگە نادەین بە شێوەی ناتەندروست و شوێنی خۆر لە گەرمی بەرز هەڵبگیرێت یان بگوازرێتەوە، لە مارکێتەکانیشدا پێویستە لەشوێنی تایبەتدا دابنرێت، هەر کارگە و کۆمپانیا و مارکێتێک پابەندی ڕێنماییەکان نەبێت ڕێکاری یاسایی لەگەڵ دەگرینەبەر.
جەختیشی كردۆتەوە، نابێت لە هیچ کات و وەرزێکدا ئاوی دەبە بەر تیشکی خۆر بکەوێت، یان پلەی گەرمییەکەی لە ٣٠ پلە بەرزتر بێتەوە.
بۆ گەیاندنی سکاڵا و زانیاری بەقائیمقامیەتی سلێمانی و لیژنە هاوبەشەکان، پەیوەندی بە ژمارە مۆبایلی (07708677777)ـەوە بکەن.
