![](https://xelk.org/wp-content/uploads/2024/03/awincity2.png)
لیژنەی گواستنەوە و گەیاندنی پەرلەمانی عێراق ڕایگەیاند، فڕۆکەخانەی سلێمانی هیچ کێشەیەکی یاسایی و کارگێڕی و ئەمنیی نییە و قەدەغەکردنی گەشتەکانیش بۆی سزای سیاسییە.
کاروان یاروەیس، ئەندامی لیژنەی گواستنەوە و گەیاندی ئەنجومەنی نوێنەران ڕایگەیاند، لەدانیشتنی ئەمڕۆی ئەنجومەنی نوێنەراندا لیژنەکەیان دوای سەردانی مەیدانی بۆ فڕۆکەخانەی نێودەوڵەتی سلێمانی ڕاگەیەندراوێکی خوێندەوە.
ڕوونیشیکردەوە کە لە ڕاگەیەندراوەکەدا داواکرا ئەنجومەنی نوێنەران و حکومەتی عێراق هەنگاوی جددی بنێن بۆ هەڵگرتنی سزاکانی سەر فڕۆکەخانەی سلێمانی.
لە ڕاگەیەندراوەکەی لیژنە پەرلەمانییەکەدا هاتووە کە فڕۆکەخانەی سلێمانی هیچ کێشەیەکی یاسایی و هونەری و ئیداری و ئەمنی نیە ئەوەی هەیە سزای سیاسیە.
تورکیا لە مانگی نیسانی 2023ەوە ئاسمانی وڵاتەکەی بە ڕووی فڕۆکەخانەی نێودەوڵەتی سلێمانیدا داخستووە و مانگی حوزەیرانی ڕابردووش جارێکی دیکە سزاکەی تا 7ی 12ی ئەمساڵ درێژکردەوە.