وەزیری دارایی هەرێم لە كۆبوونەوەیەكی لەگەڵ شاندێكی هاوبەشی دیوانی چاودێریی دارایی عێراق و هەرێمی كوردستان ڕایگەیاند، “بەردەوام دەرگامان بۆ تیمەكانی دیوانی چاودێریی دارایی كراوەبووە بۆ وردبینی و بەدواداچوون لەسەر لیستی مووچە و داهات و خەرجییەكانی هەرێمی كوردستان”.
وەزارەتی دارایی هەرێم لە ڕاگەیەنراوێكدا، كە وێنەیەكی دەست (خەڵك) كەوتووە، ڕایگەیاندووە، ئەمڕۆ چوار شەممە ئاوات شێخ جەناب، وەزیری دارایی و ئابوری پێشوازیكرد لە شاندێكی هاوبەشی دیوانی چاودێریی دارایی عێراق و هەرێمی كوردستان.
لە راگەیەندراوەكەدا هاتووە، “لە دیدارێكدا گفتوگۆكرا لەسەر كارەكانی تیمی هاوبەشی هەردوو دیوانی چاودێریی دارایی لە وەزارەت و دام و دەزگاكانی هەرێمی كوردستان لە ماوەی رابردوودا و وەزیری دارایی پشتیوانی وەزارەت و بەڕێوەبەرایەتیەكانی بۆ كاری تیمە هاوبەشەكان دووپاتكردووەتەوە”.
ئاوات شێخ جەناب ڕایگەیاندووە، بەردەوام دەرگامان بۆ تیمەكانی دیوانی چاودێریی دارایی كراوەبووە بۆ وردبینی و بەدواداچوون لەسەر لیستی مووچە و داهات و خەرجییەكانی هەرێمی كوردستان.
لای خۆشیانەوە، شاندی هاوبەشی دیوانی چاودێریی دارایی عێراق و هەرێمی كوردستان سوپاسی وەزیری دارایی و سەرجەم بەڕێوەبەرایەتیەكانی وەزارەتیان كرد لەپای ئەو هاوكاری و هەماهەنگییانەی بۆ سەرخستنی كارەكانیان ئەنجامیانداوە.
