![](https://xelk.org/wp-content/uploads/2024/03/awincity2.png)
بەرپرسی لقی گەرمیانی پارتی دیموکراتی کوردستان ڕایگەیاند لە کاتی چوونی بۆ دەوام ئۆتۆمبێلەکەی تەقیوەتەوە و ڕووداوەکەشی بە “کردەیەکی تیرۆریستی” وەسفکرد.
ئەمڕۆ دووشەممە، ئەکرەم ساڵح، بەرپرسی لقی 22ی پارتی لە گەرمیان، لە کۆنفرانسێکی ڕۆژنامەوانیدا دەربارەی ڕووداوی سووتانی ئۆتۆمبێلەکەی ڕایگەیاند، نزیکەی کاتژمیر 9:30 بەیانی کاتێک ویستم بچم بۆ دەوام ئۆتۆمبێلەکەم تەقییەوە و گڕی گرت.
وتیشی: “پێش ئەوەی ئاگرەکەمان پێ بگات لەگەڵ شۆفێر و ئەو پێشمەرگەیەی لە گەڵمان بوو دابەزین و ڕزگارمان بوو”.
بەرپرسەکەی پارتی ڕاشیگەیاند، هەموو ئاماژەکان بۆ ئەوە دەچن کە لە دوورەوە چاودێری کراوە و ڕووداوەکەش کردەوەیەکی تیرۆریسستی بووە، چونکە لەگەڵ جووڵاندنی ئۆتۆمبێلەکەیدا، تەقینەوەکە ڕوویداوە.
تا ئێستا لایەنە ئەمنییەکانی گەرمیان بە فەرمی ئەو زانیارییانەیان پشتڕاست نەکردووەتەوە و لێکۆڵینەوە لە ڕوداوەکە دەکەن.