لەسەر سكاڵای هاوڵاتییەک، دوو کەس بە تۆمەتی دزینی ئۆتۆمبێلێک لە سلێمانی دەستگیرکران.
ئەمڕۆ یەکشەممە، پۆلیسی پارێزگای سلێمانی ڕایگەیاند، دوای ئەوەی هاوڵاتییەک لە بنكەی پۆلیسی ڕزگاری سكاڵای تۆماركرد كە ئۆتۆمبێلەكەی لێ براوە، هێزەكانی پۆلیس لێكۆڵینەوەو بەدواداچوونەكانیان دەستپێكرد.
ڕوونیشیکردەوە کە دوای وەرگرتنی بڕیاری داوەر توانرا لەماوەیەكی كەمدا و لە لایەن بنكەی پۆلیسی ڕزگارییەوە دوو تۆمەتبار دەستگیربكرێن و دەستیش بگیر بەسەر ئەو ئۆتۆمبێلەدا كە تۆمەتباران بردبوویان .
پۆلیسی سلێمانی راشیگەیاند، ئێستا تۆمەتبارەکان بە بڕیاری دادوەر ڕاگیراون و لە لایەن بنكەی پۆلیسی ڕزگارییەوە پەڕاوی لێكۆڵینەوەیان بۆ كراوەتەوە.
