بەپێی پێشبینی شارەزایانی كەشناسی، ئەو شەپۆلە گەرمایەی دوو ڕۆژە ناوچەكانی هەرێمی گرتۆتەوە كۆتایی دێت و پلەكانی گەرما ڕوو لە دابەزینەوە دەكەن بەهۆی هاتنی كەشێكی فێنك لە توركیاوە و هاوكات خۆڵبارین ڕوودەدات.
ئاراس جەبار، شارەزای كەشناسی بۆ (خەڵك) ڕایگەیاند، ماوەی دوو ڕۆژە شەپۆلێکی بەرزبوونەوەی پلەکانی گەرما ناوچەکانی ھەرێمی کوردستانی گرتووەتەوە و لە کاتەکانی ئەمشەو و سبەی یەک شەممە 7/7/2024 لە ئەنجامی ھاتنی بارستە ھەوایەک لە تورکیاوە و کاریگەری بۆ سەر ناوچەکانمان پلەکانی گەرما 2 تا 3 پلە بەراورد بە ئەمڕۆ نزمدەبنەوە.
ڕاشیگەیاند، بای باشووری ڕۆژئاواش کاتەکانی نیوەڕۆ بۆ ئێوارە مامناوەند بۆ چالاک ئەبێت بەخێرایی 15-30کم/ک بەھۆی چالاکتر بوونی خێرایی با لە ڕۆژئاوای عێراقەوە ئەگەری ھاتنی شەپۆلێکی خۆڵبارین ئەبێت بۆ سەر ناوچەکانی سنوری پارێزگای کەرکوک و سەنتەری پارێزگای ھەولێر و ئیدارەی گەرمیان .
بەپێی پێشبینی ئەو شارەزا كەشناسییە، پلەكانی گەرما بۆ 39 تاوەكو 21 پلە لە زۆربەی ناوچەكان دادەبەزن و بەگشتی تا ڕۆژی چوار شەممە 10/7/2024 کاریگەری ئەو بارستە ھەوایە لەسەر ناوچەکانمان بەردەوام ئەبێت و پلەکانی گەرما بەرزنابنەوە.
