عێراق ئەو زانیارییانە پشتڕاست دەکاتەوە کە سەبارەت بە هەوڵەکانی بۆ لێکنزیککردنەوەی تورکیا و سووریا بڵاوکراونەتەوە، بەڵام کاتی دیدارە چاوەڕوانکراوەکەی ئەردۆغان و ئەسەد ئاشکرانەکراوە.
بەرپرسێکی نووسینگەی سەرۆک وەزیرانی عێراق لە لێدوانێکیدا بۆ ڕۆژنامەی شەرقولئەوسەت ڕایگەیاند، بەغدا کار لەسەر سەرخستنی نێوەندگیرییەکەی دەکات بۆ ئاساییکردنەوەی پەیوەندییەکانی نێوان دیمەشق و ئەنقەرە و دەستپێکردنی قۆناغێکی نوێی سەقامگیریی لە ناوچەکەدا.
بەرپرسەکە کە ناوی ئاشکرا نەکراوە ئەوەشی خستووەتەڕوو کە هەوڵی نێوەندگیرییەکە نوێ نییە و مانگی ڕابردوو محەمەد شیاع سودانی، سەرۆک وەزیرانی عێراق ڕایگەیاند. وتیشی: “کارە دیپلۆماسییەکانی حکومەتی عێراق بۆ هێورکردنەوە و ئاشتەوایی لە ناوچەکەدا نەوەستاون، بە تایبەتیش لەگەڵ ئەو وڵاتانەی کە سنوور و بەرژەوەندی هاوبەشی لەگەڵیاندا هەیە”.
پێشتریش میدیای سووریا بڵاویکردبووە کە ڕەجەب تەیب ئەردۆغان، سەرۆک کۆماری تورکیا و بەشار ئەسەد، سەرۆکی سووریا لە بەغدا کۆدەبنەوە، بەڵام تا ئێستا کاتی ئەو دیدارە ئاشکرا نەکراوە.
