کارەبای سلێمانی بڕی ئەمپێر و کاتژمێرەکانی پێدانی کارەبای نیشتیمانی بە هاوبەشانی ئاشکرا دەکات و دەڵێت”12 کاتژمێر کارەبای نیشتیمانی دەدەین”.
سیروان محەمەد بەڕێوەبەری ڕاگەیاندنی کارەبای سلێمانی لە لێدوانێکدا بۆ خەڵك- ڕایگەیاند، ئەو گرفتە تەکنیکییەی دوێنێ بووە هۆی کوژانەوەی سەرتاسەری کارەبی نیشتیمانی چارەسەر کراوە و ئێستا دۆخەکە وەک پێشتری لێ هاتوۆتەوە،
ئاماژەی بەوەشدا، گرفتەکە تەکنیکی بووە و بەهۆی پەستانی غاز لە کۆمپانیای دانە غاز روویداوە و خۆشبەختانە دوای چەند کاتژمێرێک چارەسەر کراوە و کارەبا دابین کراوەتەوە.
سیروان محەمەد ئەوەشی ئاشکراکرد، لە ئێستادا بارودۆخەکە وەک پێش شەتداونەکەی لێ هاتۆتەوە و ئەو بڕەی هەیە بەسەر هاوبەشانی کارەبادا دابەشدەکرێت.
دەربارەی ماوەی پێدانی کارەبا و بڕەکەی، بەڕێوەبەری ڕاگەیاندنی کارەبای سلێمانی ئەوەی خستە ڕوو، لە ئێستادا بە دیاریکراوەی نزیکەی ١٢ کاژمێر کارەبای نیشتیمانی دەدرێت بە هاوبەشان و ئەو کاتانەی دەمێنێتەوە لەلایەن مۆلیدەکانەوە پڕدەکرێتەوە،
وتیشی”دابینکردنی کارەبا لەسەر ئاستی بەرهەمهێنان و خواست لەلایەن بەشداربوانەوە وەستاوە، بەپێی پێوەری زیرەک ٣٠ ئەمپێر کارەبا دانراوە و جێگیرە، هەرکات لەو برە زیاتر بەکارهات ڕاستەوخۆ کارەبای ئەو هاوبەشە دەکوژێتەوە،
ڕاشیگەیاند، لەگەڵ نزیکبوونەوە لە وەرزی گەرما خواست لەسەر بەکارهێنانی کارەبا زیاتر دەبێت بۆیە هەوڵەکان بەردەوامن لە دابینکردنی کارەبای نیشتیمانی و ئیشەڵا لەمەی ئێستا خراپتر نابێت”.
