ئەنجومەنی سوریای دیموكرات سەبارەت بە كۆبوونەوەی نێوان وەزیرانی بەرگریی دەوڵەتی توركیا، حكومەتی دیمەشق و ڕووسیا لە ڕاگەیەندراوێكدا ئاماژەی بە ئەوەكرد”ئێمە وەك مەسەدە بە گومانەوە لە كۆبوونەوەی وەزیرانی بەرگریی حكومەتەكانی توركیا، سووریا بە پشتیوانی ڕووسیا دەڕوانین. ئێمە ڕشتنی خوێنی گەلی سووریا لە پێناو هەڵبژاردنی ئاكەپە و بەشداری حكومەتی دیمەشق لەو پەیمانانەدا شەرمەزار دەكەین”.
ڕاشیگەیاند “خۆمان بە قەرزداری گیانبازی شەهیدان، زیندانیان و كۆچبەرانی سووریایی دەزانین. هاوكات ئێمە پەیوەستین بە ئەركە مێژویی و ئەخلاقییەكەمان بەرامبەر بە سووریا”.
ڕوونیشیكردەوە “ئەم قۆناغە هەستیارە كە گەلی سووریا پێیدا تێپەڕ دەبێت پێویستی بە یەكگرتوویی هەیە بۆ ئەوەی هەموو ناكۆكی و ململانێكان كە دوژمنانی گەلی سووریا بە گوێرەی خۆیان بەكاریان دەهێنن، تێپەڕێنن. هەروەها داوا لە هەموو گەلی ئازادی خوازی سووریا دەكەین كە داهاتووی وڵات و خەونی ئازادیمان لە لێواری لەناوچووندایە، دەبێت هەموو ناكۆكییەكان بخرێنەلاوە”.
دەشڵێت “هیچ ماف و بەرژەوەندییەك لە سەرووی بەرژەوەندی و مافی گەلی سووریاوە بوونی نییە. هەروەها ئێمە داوا لە هەموو گەلە ئازادیخوازەكەمان دەكەین كە لە دژی ئەو هاوپەیمانێتییە بوەستنەوە و شكستی پێبهێنن. دەبێت هێزە شۆڕشگێڕەكان لە دژی سەرەڕۆیی و بازرگانانی خوێنی گەلی سووریا یەكبگرن”.
لەلایەكی دیكەوە فەوزە یوسف ئەندامی دەستەی سەرۆكایەتی پارتی یەكێتی دیموكرات پەیەدە بۆ ئاژانسی هەواڵی میزۆپۆتامیا ڕایگەیاند توركیا لە دروستكردنی هاوپەیمانێتییەك لەگەڵ دیمەشق و ڕووسیا ئامانجی نانەوەی شەڕی ناوخۆیە لە سووریا لەناو پێكهاتەكانی سووریادا.
