لە ئەنجامی لێکۆڵینەوە لە دۆسیەی زیندانیکراوانی عێراق، زیاتر لە 12 هەزار دەستگیرکراو و ڕاگیراو ئازادکران.
سەرۆکایەتی کۆمار ڕایگەیاند، بەمەبەستی دڵنیابوون لە جێبەجێکردنی پێوەرەکانی مافی مرۆڤ لە ناوەندەکانی گرتن و دەستبەسەرکردن و بە ئامانجی خێراکردنی تەواوکردنی لێکۆڵینەوەکان لەگەڵ ڕاگیراوان و جێبەجێکردنی پێوەرەکانی دادپەروەری و بەدواداچوون بۆ دۆسیەکانی تۆمەتباران و دوای وەرگرتنی چەندین سکاڵا، سەرۆکایەتی کۆمار لە ژێر ڕێنمایی ڕاستەوخۆی سەرۆك کۆمار د. لەتیف ڕەشید، لیژنەیەکی پێکهێنا، کە نوێنەرانی سەرۆکایەتی کۆمار و وەزارەتەکانی ناوخۆ و داد و ئەنجومەنی باڵای دادوەری و ڕاوێژکارێتی ئاسایشی نەتەوەیی لەخۆدەگرێت.
ڕوونیشیکردەوە کە لیژنەی پەیوەندیدار چەندین کۆبونەوەی ئەنجامدا و کارەکانی بوەهۆی ئازادکردنی زیاتر 12 هەزار دەستگیرکراو و ڕاگیراو، کە ماوەی سزاکانیان تەواو ببوو یاخود لەلایەن دادگای تێهەڵچونەوەوە، هەڵوەشابوونەوە.
لە ڕاگەیەندراوەکەدا هاتووە: “سەرۆکایەتی کۆمار پەرۆشی هەمیشەیی سەرۆك کۆمار بۆ درێژەدان بە کارکردن لەم بوارەدا دووپاتدەکاتەوە و هەوڵەکانی بەردەوامدەبێت بۆ چەسپاندنی بنەماکانی یاسا و مسۆگەرکردنی جێبەجێکردنی بەشێوەیەکی ڕاست و دروست، کە گرەنتی دەبێت بۆ بەدیهێنانی ژیانێکی شکۆمەندانە بۆ ڕۆڵەکانی گەل لە سەرتاسەری عێراقدا بەبێ هیچ پشتگوێخستنێك یاخود جیاکارییەك”.
