پاسەوانی کەناراوەکانی ئیتاڵیا ١٤ تەرمی دیکەی نێو بەلەمە ژێرئاوکەوتوەکەی کەناراوەکانی ئیتاڵیایان دۆزییەوە کە هەشتیان منداڵن، لە ئێستاشدا فڕۆکە و بەلەمی سەر بە پاسەوانی کەناراوەکانی ئیتاڵیا لە گەڕان بەردەوامن بۆ دۆزینەوەی تەرمەکانی دیکە.
میدیای (Reggio today)ی ئیتاڵیبڵاویکردەوە، تەرمی ژمارەیەک کۆچبەری دیکە لە کەناراوەکانی کالابریا دەرهێنران و بەرەو بەندەری گراتسی بەرێکران، ژمارەی تەرمەکان ١٤یە و پێکهاتون لە چوار ژن و دوو پیاو و هەشت منداڵ.
تاوەکو ئێستا تەرمی٢٠ کۆچبەری یەختە ژێرئاوکەوتوەکە دۆزراونەتەوە کە پێکهاتون لە شەش پیاو شەش ژن و هەشت منداڵ، بە وتەی رزگاربوەکانی نێو ئەو یەختەش زیاتر لە ٦٠ کەس لە نێو یەختەکەدابوون.
تەرمەکان لەلایەن پاسەوانی کەناراوەکانی ئیتاڵیا دۆزراوەتەوە، لە ئێستاشدا بەلەم و فڕۆکەی دیکە رەوانەی شوێنی ئەو تەرمانە کراون بۆ ئەوەی پرۆسەی گەڕان و دۆزینەوەی تەرمی کۆچبەرەکانی دیکە بەردەوام بێت.
رۆژی ١٧ی حوزەیرانی ٢٠٢٤، دوو بەلەم لە دەریای ناوەڕاست لە نزیک کەناراوەکانی ئیتاڵیا ژێرئاوکەوتن، کە یەکێکیان ژمارەیەک کۆچبەری هەرێمی کوردستانی تێدابوو.
