سعودیە ژمارەی حاجییانی ئەمساڵی ڕاگەیاند

دەستەی گشتی ئاماری سعودیە ژمارەی حاجییانی وەرزی حەجی ئەمساڵی ڕاگەیاند و ئاشكرای كرد، زیاتر لە (ملیۆنێك و 833 هەزار) حاجییە.

دەستەی گشتی ئاماری سعودیە لە بەیاننامەیەكدا ئاماژەی بەوەكردووە، تێكڕای ژمارەی میوانانی ماڵی خودا بۆ حەجی ئەمساڵ گەیشتۆتە (ملیۆنێك و 833 هەزارو 164) حاجی، كە لەم ژمارەیە، (ملیۆنێك و 611 هەزار و 310) حاجی لە دەرەوەی سعودیەوە هاتوون، لە ناوخۆی وڵاتیش ژمارەیان (221 هەزار و 854) كەسە.

ئاماژەی بەوەشكردووە، لە تێكڕای حاجییانی ئەمساڵ، (958 هەزارو 137) حاجی لە ڕەگەزی نێر و (875 هەزار و 25) حاجی لە ڕەگەزی مێینەن.

ڕوونیشی كردۆتەوە، حاجیانی دەرەوە، بە سێ ڕێگا بۆ بەجێهێنانی فەریزەی حەج چوونەتە ناو خاكی سعودیەوە، بەجۆرێك (ملیۆنێك و 546 هەزارو 345) حاجی لەڕێگەی دەروازە ئاسمانییەكانەوە و (60 هەزار و 251) حاجی لەرێگەی دەروازەی وشكانییەوە و (4 هەزار و 714) حاجی لەرێگەی دەریاییەوە بووە.