بەڕێوەبەرایەتی هاتووچۆی هەولێر ئاشكرای دەكات، سەرەڕای بوونی چەندین بەربەست و شریت و ئاگاداركردنەوە، بەڵام دوو ئۆتۆمبێل خۆیان كێشاوە بە بەربەستە كۆنكرێتییەكانی پڕۆژەیەكی ئاوەڕۆ و یەكێكیان كەوتۆتە ناو ئاوەڕۆكەوە.
فازڵ حاجی، وتەبێژی هاتووچۆی هەولێر بۆ (خەڵك) ئاماژەی بەوەكرد، لەگەڵ ئەوەی هەموو پێداویستیەكانی سەلامەتی و هێمای ئاگاداركردنەوەی شوێنی كار و شریت و فسفۆر و گلۆپ و بەربەست دانراوە لەشوێنی كاركردن لەسەر ڕێگای (هەولێر – پیرمام) بەڵام لەكەمتر لە ٥ كاتژمێردا ٢ ئۆتۆمبێل خۆیان بەبەربەست و شریتەكاندا كێشا.
ڕاشیگەیاند، ئۆتۆمبێلی یەكەم، كە لەكاتی بەرەبەیان بوو، بەهۆی خێرایی زۆر و بێئاگایی خۆی كێشا بە پارچە كۆنكرێتیەكان لەپاش بڕینی سەرجەم ئاگادارییەكان، ئۆتۆمبێلی دووەمیش لەدوای ئەو هات و بەهەمان شوێنی بەردە لادراوەكە چووە ژوورێ و كەوتە ناو ئاوەڕۆكەوە.
ئاشكراشی كرد، لە ڕووداوەكەدا زیانی گیانی نەبوو، بەڵام زیانی مادی زۆر كەوتەوە.
وتەبێژی هاتووچۆی هەولێر داوا لە شۆفێران دەكات، “لەشوێنی كاركردنەكان زیاتر بەئاگابن و لێخوڕین بەخێراییەكی كەم بكەن”.
