ئەمڕۆ دواهەمین کاروانی هەرێمی کوردستان لە ڕێگەی هەردوو فرۆکەخانەی نێودەوڵەتی هەولێر و سلێمانی بۆ بەجێهێنانی فەریزەی حەج بۆ سعودیە بەڕێکەوتن.
ئەمڕۆ سێشەممە، بەڕێوەبەرایەتی گشتی حەج و عومرەی هەرێمی کوردستان ڕایگەیاند، ئەمڕۆ دوا کاروانی حاجییانی کوردستان لە ڕێگەی هەردوو فرۆکەخانەی نێودەوڵەتی هەولێر و سلێمانی بەرەو سعودیە بەڕێدەکەون.
لای خۆیەوە کاروان ستوونی، وتەبێژی حەج و عومرەی هەرێمی کوردستان ڕایگەیاند، تا ئێستا چوار هەزار و 340 حاجی کوردستان بۆ بەجێهێنانی فەریزەی حەج گەیشتوونەتە سعودیە و ئەمڕۆش دواهەمین کاروانی حاجییان بەڕیکەوتن کە ژمارەیان 345 حاجییە.
وتەبێژی حەج و عومڕەی هەرێمی کوردستان ئاشکراشی کرد، ڕەوشی تەندروستی حاجییان زۆر باشە و هەموویان سەلامەتن و ڕۆژانە تیمی تەندروستی کە ژمارەیان 21 پزیشک و کارمەندی تەندروستییە چاودێری تەندروستی حاجیان دەکەن.
هاوکات دوێنێ دووشەممە، بەرێوەبەری گشتی حەج و عومڕەی هەرێمی کوردستان و سەرپەرشتیاری پرۆسەی حەجی ئەمساڵ شێخ نیاز راغب نەقشبەندی گەیشتە وڵاتی سعودیە.
