زانكۆی سلێمانی ڕێكارەكانی دامەزراندنی سێ یەكەمەكانی دەستپێكرد و داوا لە دەرچووان دەكات سەردانی بانكەكانی سنووری شار و شارۆچكەكانی خۆیان بكەن بۆ ئەنجامدانی بایۆمەتری.
د. پێشڕەو حەمەجان، یاریدەدەری سەرۆكی زانكۆی سلێمانی بۆ كاروباری خوێندكاران لە ڕاگەیەنراوێكدا ئاماژەی بەوەكردووە، سەرجەم سێ یەكەمەكانی دەرچووی ساڵانی خوێندنی ( ۲٠۱۷ تاوەکو ٢٠٢٣)ی زانكۆی سلێمانی لەڕۆژی دوو شەممەوە (٣-٦-٢٠٢٤)ەوە بە بەڵگەنامەی وەک کارتی نیشتمانی سەردانی بانكی مەڵكەندی لە خوار پردی كۆبانی (بانكی باخانی پێشوو) بكەن بۆ ئەنجامدانی بایۆمەتری.
ڕاشیگەیاندووە، ئەوانەی دانیشتووی شارەكانی (هەڵەبجە و پێنجوێن و كەلار و دەربەندیخان و ڕاپەڕین و چەمچەماڵ و سیدصادق)ن سەردانی بانكەكانی شارەكانی خۆیان بكەن بۆ هەمان مەبەست.
ڕوونیشی كردۆتەوە، ئەوانەی هاوسەرگیریان کردووە و نیشتەجێی شارێکی ترن دەتوانن لە بانکەکانی ئەو ناوچانە بایۆمەتری بکەن.
