![](https://xelk.org/wp-content/uploads/2024/03/awincity2.png)
باوکان ئەو ڕێنوێیەن کە دەتوانن منداڵان فێری زۆر ئاکار و ڕەفتار بکەن، کاریگەری باوکان لەسەر منداڵان بە جۆرێکە، لە خوو و ئاکارییان دەردەکەوێت.
هەرچەندە زۆرینەی باوکان ڕۆژانە سەرقاڵی ئیش و کارەکانیانن، کاتێک ئێوارەدا دێت بەرەو ماڵ دەگەڕێنەوە و لەگەڵ منداڵەکانیان پێك شاد دەبنەوە، بەڵام کاریگەرییان لەسەر منداڵەکانیان زۆرە و ڕەنگدانەوەی هەیە.
د. بەختیار کەمال تاڵەبانی، ی-پرۆفیسۆر-دکتۆرا، و ماموستا لە زانكۆ، لەپەڕەی تایبەتی خۆی لە سۆشیال میدیای فەیسبووک چەند خاڵ و ڕەهەندێکی لەبارەی کاریگەری باوک لەسەر منداڵان، و هۆشییاری بۆ باوکان کە چۆن هەوڵ بدەن ئاکارێکی باش ئەنجام بدەن لەبەرچاوی منداڵەکانیان خستۆتەڕوو.
د.بەختیار دەڵێت:
* کاتێک بانگ دەفەرموێت، باوک تەلەفزیۆنەکە بکوژێنێتەوە و بچێت بۆ مزگەوت، بەمەش منداڵ فێر دەبێت پابەندی نوێژەکانی ببێت.
* کاتێک باوک دەگەڕێتەوە بۆ ماڵەوە لەدەرگا بدات و بڵێت (السلام علیکم) و زەردەخەنە بە ڕووی هاوسەر و منداڵەکانیدا بکات، بەمەش منداڵ فێری مۆڵەت وەرگرتن و سڵاو کردن و زەردەخەنە دەبێت.
*باوک لەبەرچاوی منداڵ ڕێزی دایک و باوکی بگرێت و دەستیان ماچ بکات، ئەو کات منداڵەکەی لە کاتی خۆیدا ڕێزی دەگرێت و دەستی ماچ دەکاتەوە.
*باوک لە کارەکانی ماڵەوە یارمەتی خێزانی بدات، بەو جۆرەش منداڵ فێری یارمەتی و هاوکاری خەڵکانی تر دەبێت.
*دایک و باوک لەبەرچاوی منداڵ شەڕ نەکەن و دەنگ بەرز نەکەنەوە و بێڕێزی بەرامبەر یەک نەکەن، بەو جۆرەش منداڵ هۆگری ماڵەوە دەبێت و زیاتر خۆشەویستی بۆی دەبێت و لێی ڕاناکات.
*باوک سیلەی ڕەحم لەگەڵ خزمەکانی جێبەجێ بکات، بەوەش منداڵ لێیەوە فێر دەبێت لەگەڵ خزمەکانی گەرم و گوڕ بێت.
*باوک جار جارە ڕاوێژ بە منداڵەکانی بکات دەربارەی هەندێک کاری دیاریکراو، بەوەش منداڵ فێری کاری هاوبەش و وەرگرتنی ڕای ئەوانی تر دەبێت.
*باوک لەگەڵ منداڵەکانی ڕاستگۆ بێت و پابەندی بەڵێنەکانی بێت، بەوەش منداڵەکانی فێری ڕاستگۆیی دەبێت.
*باوک دایک پابەندی پاک و خاوێنی و سیستەم و یاسا بن، منداڵەکانیش فێری هەمان شت دەبن.