بەراورد بە دوو هەفتەی ڕابردوو نرخی كیلۆیەك مریشكی زیندوو نزیكەی 500 دیناری چۆتەوە سەر و سەرۆكی كۆمەڵەی كێڵگە پەلەوەرییەكان دەڵێت: خاوەنی كێڵگە پەلەوەرییەكان لە ئێستاشدا لە زەرەردان.
یونس محەمەد، كە دوكانی فرۆشتنی مریشكی هەیە بۆ (خەڵك) ڕایگەیاند، نرخی كیلۆیەك مریشكی زیندوو لە بازاڕدا بەرزبۆتەوە بۆ 2 هەزار و 600 دینار لەكاتێكدا هەفتەی ڕابردوو دابەزیبوو بۆ نزیكەی 2 هەزار دینار.
لای خۆشیەوە، نازم عەبدوڵا، سەرۆكی كۆمەڵەی كێڵگە پەلەوەرییەكان ڕایگەیاندووە، نرخی یەك كیلۆ مریشك لە كێڵگە پەلەوەرییەكان بە دوو هەزار و 250 بۆ دوو هەزار و 400 دینار دەفرۆشرێت و بە بەراورد بە دوو هەفتە پێش ئێستا كەمێك نرخەكەی بەرزبووەتەوە.
وتیشی، “ئێستا خاوەنی كێڵگە پەلەوەرییەكان لە زەرەردان بەو پێیەی یەك كیلۆ مریشك دوو هەزار و 800 دینار لەسەر خۆیان دەكەوێت و بە دوو هەزار و 250 دینار بۆ دوو هەزار و 400 دینار دەیفرۆشن”.
