ئاسایشی هەولێر لەبارەی دۆزینەوەی تەنێکی نامۆ لە ناو گەنمی جووتیاران ڕاگەیەندراوێکی بڵاوکردووەتەوە و دەڵێت:”ئەو تەنەی لە ناو گەنمەکەی ناحیەی قوشتەپە دۆزرایەوە یارییەکی ترسناکی مناڵانە نابێتە هۆی ئاگر کەوتنەوە.
بەڕێوەبەرایەتی ئاسایشی هەولێر راگەیەندراوێکی بڵاوکردووەتەوە و دەڵێت:”سەبارەت بە هەبوونی (تەنێکی نامۆ) کە لە چەند ڕۆژی ڕابردوودا لە گوندی (کەڕزۆر) سەر بە ناحیەی قوشتەپە لە ناو زەوی و زاری جوتیارێک لە کاتی دروێنەکردنی گەنمەکەی دۆزرایەوە، دەستبەجێ تیمی پوچەڵ کردنەوەی بۆمبی بەڕێوەبەرایەتیەکەمان گەیشتنە شوێنی ئاماژە پێکراو، هەڵسان بە هەڵگرتنەوەی ئەو تەنە نامۆیە و لابردنی مەترسی لەو شوێنە”
راشیگەیاند، پاش پشکنین و شیکارکردنی دەرکەوت ئامێرێکی یاریکردنی ترسناکی منداڵانە کە لە بۆنەی یادکردنەوەی (هاڵۆوین) بەکاردەهێنرێت و چەند گڵۆپێکی بچوکی جوانکاری تێدایە بۆ ماوەیەکی زۆرە لەو شوێنە دانراوە و هیچ ماددەیەکی تەقینەوەی لەگەڵ نەبەستراوە، هەروەها ناشبێتە هۆکاری هیچ جۆرە ئاگر کەوتنەوەیەک .
