لە ئێران پرۆسەی ناو تۆمارکردنی کاندیدەکان بۆ هەڵبژاردنی سەرۆکایەتی کۆمار دەستیپێکرد، کە بڕیارە ڕۆژی ٢٨ی حوزەیران بەڕێوەبچێت.
ئەمڕۆ پینجشەممە، ئەحمەد وەحیدی، وەزیری ناوخۆی ئێران لە کۆنگرەیەکی ڕۆژنامەوانیدا ڕایگەیاند: ”لە هەلومەرجێکی وا هەستیاردا کە خاڵی وەرچەرخانە لە مێژوویی ئێران دا و سەرەڕای زیانێکی وا گەورە، بە ڕێبەرایەتی سەرکردەی شۆڕش (ڕێبەری ئێران، ئایەتوڵڵا عەلی خامنەیی) و بە دەستوور هیچ پەککەوتنێک لە ئیدارەی وڵاتدا ڕووینەدا”.
وەحیدی باسی لەوە کرد کە بە تۆماری ناوی کاندیدەکان، ١٤هەمین پرۆسەی هەڵبژاردنی سەرۆکایەتی کۆمار دەستیپێکردووە و، ڕایگەیاند: “پرۆسەی ناو تۆمارکردن بۆ هەڵبژاردنی سەرۆکایەتی کۆمار پێنج ڕۆژ دەخایەنێت، حەوت ڕۆژ بۆ پشکنینی بڕوانامە و لێهاتووییەکانی کاندیدەکان و ١٤ ڕۆژیش بۆ بەڕێوەبردنی کەمپینی کاندیدان تەرخان کراوە”.
هیوای خواست هەڵبژاردنەکە لە کەشێکی ئارام و ئەمنی تەواودا و بە کێبڕکێیەکی بەرز و بەشدارییەکی فراواندا بەڕێوەبچێت.
ڕۆژی ١٩ی ئایار ھێلیکۆپتەرێک کە ئیبراھیم ڕەئیسی، سەرکۆماری ئێران و وەزیری دەرەوە چەند بەرپرسێکی ئێرانی ھەڵگرتبوو، دوای گەڕانەوەی لە بەسەرکردنەوەی ھەوڵەکانی دروستکردنی بەنداوێک لەسەر سنوورەکانی ئازەربایجان، بەھۆی نالەباری کەشوھەواوە کەوتە خوارەوە و سەرجەمیان گیانیان لەدەستدا.
