ناوەندی فەرماندەیی لەشكری ئەمریكا CENTCOM ڕاپۆرتێكی بڵاوكردووەتەوە سەبارەت بە ئاماری چالاكییەكانی دژی داعش لەماوەی ساڵی 2022 ڕایدەگەیەنێت، لە گەڵ هێزە هاوبەشەكانیاندا سەدان ئۆپەراسیۆنیان دژ بە داعش لە عێراق و سوریا ئەنجام داوە و لەو ئۆپەراسیۆنانەدا 215 ئەندامی داعش دەستگیركراون و 466 دیكەشیان كوژراون.
ناوەندی فەرماندەیی لەشكری ئەمریكا CENTCOM ڕاپۆرتێكدا ئاماری كار وچالاكییەكانی لەماوەی ساڵی 2022 بڵاوكردووەتەوە و تێیدا هاتووە، كە ئۆپەراسیۆنەكانیان كاریگەربوون بۆ لاوازكردنی داعش و لە ناوبردنی بەرپرسەكانی لە ناویاندا “ئەمیری داعش”و دەیان ڕابەری هەرێمی و سەدان لە چەكدارانیان.
ئاماژە بۆ ئەوەشكراوە، كە هەموو ئەم ئۆپەراسیۆنانە بەشێك بوون لە ئەركی كەمكردنەوەی تواناكانی ئەو گروپە تیرۆرستییە بۆ ئاڕاستەكردن و هاندانی هێرشی تێكدەرانە لە ناوچەكە و جیهاندا، بە وڵاتە یەكگرتووەكانی ئەمەریكاشەوە.
ئاشكراشیكردووە، لە ساڵی 2022 دا بە گشتی 313 ئۆپەراسیۆنی دژی داعش لە عێراق و سوریا ئەنجام دراوە و لە سوریا 108 ئۆپەراسیۆنی هاوبەش و 14 ئۆپەراسیۆنی ئەمەریكا بە تەنها ئەنجام دراوە. لەو ئۆپەراسیۆنانەدا 215 ئەندامی داعش دەستگیركراون و 466 دیكەشیان كوژراون.
هاوكات لە عێراق 191 ئۆپەراسیۆنی هاوبەش ئەنجام دراوە 159 ئەندامی داعش دەستگیركراون و 220 ئەندامیش كوژراون و هەروەها هێزەكانی سوریای دیموكراتیك و هێزی ئاسایشی عێراقی ڕۆڵێكی گرنگیان هەبووە و بەردەوامیش هەیانە، لە بەدەستهێنانی شكستی هەمیشەیی داعش.
