جێگری سەرۆكی حكومەتی هەرێمی كوردستان ڕایدەگەیەنێت، ڕاستە كێشەی كەڵەكەبووی زۆر هەیە لە نێوان هەردوولادا، بەڵام دەكرێت بە نیشاندانی نیازپاكیی و كاری هاوبەش هەنگاو بە هەنگاو كێشەكان چارەسەربكەین.
قوباد تاڵەبانی، جێگری سەرۆكی حكومەتی هەرێم لەگەڵ فرانك ریڤۆڵتۆ، نوێنەری نەتەوە یەكگرتووەكان لە هەرێم كۆبووەوە و دوایین پێشهاتە سیاسییەكانی عێراق و كوردستان و پرسی هەڵبژاردن و چەند بابەتێكی دیكەی جێی بایەخی هەردوولایان تاوتوێكرد.
بەپێی ڕاگەیەنراوی نووسینگەی جێگری سەرۆكی حكومەت، قوباد تاڵەبانی ڕۆڵی یۆنامی و بە تایبەت جێنین پلاسخارت، نوێنەری تایبەتی پێشووی سكرتێری گشتیی نەتەوەیەكگرتووەكانی بەرزنرخاند لە چارەسەركردنی كێشە سیاسییەكانی عێراق و كوردستان.
سەبارەت بە پەیوەندییەكانی نێوان هەرێم و بەغداش، قوباد تاڵەبانی ڕوونیكردەوە، لەم قۆناغەدا لێكتێگەیشتنی باش هەیە بۆ چارەسەركردنی كێشەكان.
وتیشی، “ڕاستە كێشەی كەڵەكەبووی زۆر هەیە لە نێوان هەردوولادا، بەڵام دەكرێت بە نیشاندانی نیازپاكیی و كاری هاوبەش هەنگاو بە هەنگاو كێشەكان چارەسەربكەین، چونكە بەبێ چارەسەركردنی كێشەكان و بەبێ ستراتیژ و كاری هاوبەش ناتوانرێت بیر لە گەشەپێدانی عێراق و كوردستان و دابینكردنی ژیانی شایستە بۆ هاووڵاتییان بكەینەوە”.
بەپێی ڕاگەیەنراوەكە، “پرسی هەڵبژاردنی پەرلەمانی كوردستان تەوەرێكی دیكەی كۆبوونەوەكە بووە و باس لە دوایین گۆڕانكارییەكانی تایبەت بە هەڵبژاردن كرا”.
