كۆمەڵێك كەسایەتی سیاسی و سەندیكایی لە فەرەنسا، داوا دەكەن ئاسایش و دادپەروەریی و ئازادی بۆ كوردەكانی دانیشتووی فەرەنسا دابین بكرێت، پاش ئەو هێرشەی لە هەینی ڕابردوودا لە پاریس كرایە سەر سەنتەری كلتوری كورد.
بەپێی نامەیەك كە لە ڕۆژنامەی “لۆمۆند”ی فەرەنساییەوە بڵاوكرایەوە، كەسایەتییەكان و لەنێوانیاندا مارین تۆندلێر و ئەكەت بوڵات دەڵێن:”بەبێ زامنكردنی دادپەروەرییەكی ڕاستەقینە و ئازادی، كۆمەڵگەی كورد لە فەرەنسا و ئەوروپا، هەرگیز هەست بە دڵنیایی ناكات”.
هەر لە نامەكەدا هاتووە:”گەلی كورد گەورەترین نەتەوەیە لە جیهاندا كە بەبێ دەوڵەتە، ئەو گەلە زیاتر لە ٤٠ ملیۆن كەس دەبێت، لە دوای جەنگی یەكەمی جیهانەوە كۆڵۆنیاڵكرا”.
كەسایەتییەكان لە نامەكەیاندا نوسیویانە:”ئاشكرایە ئەو كارە قێزەونەی لە هەینی ڕابردوودا ڕوویدا، مەسەلەی سەرهەڵدانی ڕاستڕەوە توندڕەوەكان لە فەرەنسادا دەخاتەڕوو، وێڕای بەرپرسیارێتی گەورەی ژنان و ئەو سیاسەتوانانەی بیانیان بە شەڕەنگێز تۆمەتبار دەكەن”.
كەسایەتییە فەرەنساییەكان دەڵێن:”هێرشەكە زیاترە لە تاوانێك كە لەلایەن كەسێكی ڕەگەزپەرستەوە ئەنجامدرابێت، ترسنۆكییە ڕەهەندەكانی تری كێشەكە بشاردرێنەوە كە لایەنی گەورەی كێشەكەن”.
ئەو كەسایەتییە فەرەنساییانە باس لە مێژوو دەكەن و نوسیویانە:”كوردستان بەشێك بووە لە دەسەڵاتی عوسمانی و پاشان لەلایەن هێزە خۆرئاواییەكانەوە دابەشكراوە لەنێوان توركیا و سوریا و ئێران و عیراق بەپێی بەڵێننامەی لۆزانی ساڵی ١٩٢٣”، داواشیان كردووە هەموو هەماهەنگییەك لەگەڵ هەواڵگری توركیا سەبارەت بە ئۆپۆزسیۆنە كوردەكان ڕابگیرێن و ئاسایش و سەلامەتی كوردەكان لە فەرەنسا و ئەوروپادا بپارێزرێت.
هەر لە نامەكەدا داوای دامەزراندنی یەكەیەكی تایبەت بە ئاگاداركردنەوە لە هەر هەوڵێكی تۆقاندن و هەڕەشەكردن لەدژی ئۆپۆزسپۆنی كورد و لێكۆڵینەوە لە هەموو سكاڵاكانی پەیوەست بەو ڕاپۆرتانە كراوە و داواش كراوە ناوی پارتی كرێكارانی كوردستان لە لیستی ڕێكخراوە تیرۆریستییەكان بسڕدرێتەوە.
