سکرتێری پەرلەمانی عێراق ڕایدەگەیەنێت، خشتەکانی بودجەی ساڵی 2024 گەیشتووەتە پەرلەمان و لە كۆبوونەوەكانی داهاتوودا دەنگیان لەسەر دەدرێت.
سەفوان بەشیر، سکرتێری پەرلەمانی عێراق ئاماژەی بەوەکردووە، خشتەی بودجە لە حکومەت وەرگیراوە و ڕەوانەی سەرۆکایەتیی پەرلەمان دەکرێت، تاوەكو بخرێتە خشتەی كاری كۆبوونەوەكانی پەرلەمانەوە.
جەختیشی كردەوە، ماوەی وەرزی یاسادانان بۆ 30 ڕۆژ درێژكراوەتەوە و بڕیارە لە كۆبوونەوەكانی داهاتوودا دەنگ لەسەر خشتەكانی بودجە بدرێت تاوەكو بكەونە بواری جێبەجێ كردنەوە.
بەپێی ڕێككەوتنی هەولێر و بەغدا، لە خشتەكانی بودجەی گشتی فیدڕاڵیدا بۆ ساڵی 2024، كە لە چەند ڕۆژی ڕابردوودا لە ئەنجوومەنی وەزیران پەسەندكرا، پشكی هەرێمی كوردستان لە مووچەی فەرمانبەران و مووچەخۆران جیاكراوەتەوە لە خەرجی فیعلی و بەوەش ناردنی پارەی مووچە مانگانە مسۆگەر دەكرێت و لە ناكۆكیەكانی نێوان هەرێم و بەغدا دووردەخرێتەوە.
