لە یەکێک لە بتڵەکانی کلۆر لە پڕۆژەی ئاوی خواردنەوەی خاس لە شارۆچکەی قەڵادزێ، لێچوون ھەیە و سەرپەرشتیاری پڕۆژەکەش ھۆشداری دەدات بە هاووڵاتییانی ناوچەکە.
بۆجاری دووەم لە پڕۆژەی ئاوی خاس لە شارۆچکەی قەڵادزێ، یەکێک لە بتڵەکانی کلۆر لێچوونی ھەیە و دانیشتوانی نزیک لە پڕۆژەکە و هاووڵاتییان ئاگادار دەکرێنەوە کە لە پڕۆژەکە نزیک نەبنەوە و سەرپەرشتیاری پڕۆژکەش دەڵێت: سەرقاڵی کۆنتڕۆڵکردنینی لێچوونەکەین.
مارف مەحمود سەرپەرشتیاری پڕۆژەی ئاوی خاس لە شارۆچکەی قەڵادزێ ڕاگەیاند: ئەمڕۆ جارێکی تر لێچوون لە یەکێک لە بتڵەکانی کلۆرھەیە لە پڕۆژەکە، لە ئێستادا تیمەکان سەرقاڵی کۆنتڕۆڵکردنین، و بەشێکی زۆری لێچونەکە کۆنترۆڵکراوە،
وتیشی، بەهۆی ئەوەی تا ئێستا نەتوانراوە ١٠٠./. لێچوونەکە کۆنترۆڵ بکەین، ھێشتاش مەترسی ھەیە و ئەگەری زیاد بوونی لێچوون ھەیە، بۆیە پێویستە هاووڵاتییان و گوندنشینانی نزیک لە پڕۆژەکە دوور بکەونەوە و خۆیان بپارێزن.
لە سەرەتای مانگی ئایاردا، بەھۆی لێچوونی کلۆر لە یەکێک لە بتڵەکانی پڕۆژەکەوە پۆلیسێک گیانیلەدەستدا و چەند کەسێکی تریش بەھۆی ژەھراوی بوونەوە ڕەوانەی نەخۆشخانە کران.
