سەرۆك کۆماری عێراق پێشوازیکرد لە د.مەحمود مەشهەدانی، سەرۆکی پێشووتری پەرلەمانی عێراق و كاندیدی سوننەكان بۆ ئەو پۆستە.
سەرۆكایەتی كۆماری عێراق بڵاویكردەوە، ئەمڕۆ سێ شەممە 14-5-2024 لەکۆشکی بەغداد، د. لەتیف ڕەشید، سەرۆك كۆماری عێراق پێشوازی كرد لە د.مەحمود مەشهەدانی، سەرۆکی پێشووتری پەرلەمانی عێراق و باسیان لە گرنگی هاریکاری و هاوئاهەنگی نێوان هێزە سیاسییەکان کرا بۆ بەهێزکردنی ئاسایش و سەقامگیری لە وڵات.
بەپێی ڕاگەیەنراوەكە، جەخت لە پشتیوانیکردنی هەوڵەکانی حکومەت لە جێبەجێکردنی کارنامەکەی و باشترکردنی بژێوی هاووڵاتیان و پڕۆژەکانی خزمەتگوزاری و وەبەرهێنان كردەوە.
ئەوەش هاتووە، “گفتوگۆیان کرد لەبارەی هەڵبژاردنی سەرۆکی نوێی پەرلەمان و یەکلاکردنەوەی ئەم دۆسێیە لەڕێگەی لێکتێگەیشتنی نێوان لایەنە سیاسییەکان و ڕەچاوکردنی بەرژەوەندی باڵای وڵات، بەشێوەیەك کە یارمەتیدەربێت بۆ بەردەوامی کارەکانی پەرلەمان لە یاسادانان و چاودێریکردندا”.
ئەمە لەكاتێكدایە، كە زۆرینەی سوننەكان پاڵپشتی مەحمود مەشهەدانی دەكەن بۆ وەرگرتنی پۆستی سەرۆكی پەرلەمان، دوای ئەوەی ماوەی چەند مانگێكە ئەو پۆستە چۆڵ بووە بەهۆی دوورخستنەوەی محەمەد حەلبوسی بەبڕیاری دادگای فیدڕاڵی.
