قادر حەمەجان ئەندامی ئەنجومەنی باڵای سیاسی و بەرژەوەندییەكانی یەكێتی رایگەیاند، نابێت لایەنەكان كات بەفیڕۆ بدەن و لێگەڕێن لەوە زیاتر ناكۆكییەكانیان درێژە بكێشێت.
لە سەردانێكیدا بۆ ئەنجومەنی باڵای ڕێکخراوە خاوەن پێداویستییە تایبەتەکان، حاكم قادر حەمەجان رایگەیاند، پێویستە پانتای ئازادی ڕادەربڕین و بیروڕاو كاری ڕۆژنامەگەری زیاتر فراوانتر بكرێت و ناكرێت لەژێر ھیچ پاساوێكدا سنوورەكانی كاركردن بەرتەسكبكرێتەوەو ئازادییەكان زەوت بكرێن، وە كاری ڕۆژنامەنووسی سنووردار بكرێت، ھەروەھا پێویستە ڕۆژنامەنووسان ئازاو بوێربن لە نیشاندانی ڕاستییەكان و لە گەیاندنی زانیارییەكان ڕۆڵی كاریگەرتر ببینن لە پێشخستنی پرۆسەی دیموكراسی و ڕووبەڕووبوونەوەی گەندەڵی بەپێی یاساو مافەكانی مرۆڤ.”
لەبارەی پەیوەندی نێوان لایەنەكانی ھەرێم بە تایبەت یەكێتی و پارتی، حاكم قادر جەختی لەسەر ئەوە كردەووە، “نابێت لایەنەكان كات بەفیڕۆ بدەن و لێگەڕێن لەوە زیاتر ناكۆكییەكانیان درێژە بكشێت، باشترین چارەسەر لە ئێستادا لە ناوخۆی ھەرێم تەنھا دانیشتن و گفتوگۆ و دیالۆگە، بۆیە بە پێچەوانەوە هەر کەس و لایەنێك کێشە بۆ یەکڕیزی دروست بکات دەبێتە هۆی مەترسی بۆ سەر بەرژەوەندییە باڵاكانی گەلی كوردستان، وەك یەكێتی نیشتیمانیش ھەمیشە لەگەڵ چارەسەركردنی كێشەكان بووین بە شێوەیەكی ئاشتیانـە.”
لەبارەی داگیركردن و لێسەندنەوەی بینای “كۆمەڵەی كەڕولاڵانەوە”، حاكم قادر ڕایگەیاند، “پێویستە بارەگای تەرخانكراوی كۆمەڵەی كەرولاڵەكان كە لە ساڵی 2005 تەرخانكراوە بگەڕێنرێتەوە بۆ كۆمەڵەكە یاخود بەپێی یاسا قەرەبووی تەواو بكرێنـەوە.”
