دوای سەقامگیربوونی دۆخی كەشوهەوای ناوچەكانی هەرێم لە دوانیوەڕۆی ئەمڕۆدا، بەپێی ڕاپۆرتە كەشناسییەكان، سبەینێ شەپۆلێكی دیكەی باران و تەرزە دەستپێدەكاتەوە و سەرەتا ناوچەكانی هەولێر و دهۆك دەگرێتەوە و لەدوانیوەڕۆوە شەپۆلەكە دەگاتە سلێمانی و هەڵەبجە، بەڵام لە سنووری گەرمیان ئەگەری باران لاوازە.
ئاراس جەبار، شارەزای كەشناسی بۆ (خەڵك) ڕایگەیاند، لەئەنجامی كاریگەری نزمە پاڵەپەستۆی دەریای ناوەراست و ناجێگیری دۆخی بەرگەھەوا سبەی یەك شەممە 5/5/2024 لەنێوان كاتەكانی بەیانی بۆ نیوەڕۆ لەناوچەكانی پارێزگای دھۆك و ھەولێر ئاسمان بە زۆری دەگۆڕێت بۆ نیمچە ھەور ناوبەناو ھەورە بروسكە و تاوەباران لەشوێنی جیاجیادا چالاك ئەبێت لەنێویاندا ئەگەری بارینی تەرزە و بارانی بەخوڕ و بەھێز ئەبێت بەتایبەت لە سەنتەری شاری ھەولێر و دەورووبەری و بەرزبوونەوەی ئاستی ئاو لە شەقامەكان و ناوچە نزمەكاندا.
ڕاشیگەیاند، لەناوچەكانی دیكە كەش لەو مەودایەدا سەقامگیر ئەبێت، لە نێوان كاتەكانی نیوەڕۆ بۆ ئێوارە لەناوچەكانی پارێزگای سلێمانی و ھەڵەبجە و باكوری گەرمیان و سنوری ئیدارەی ڕاپەرین ئەگەری چالاكبوونی ھەورە بروسكە و تاوە تەرزە و بارانی ڕێژە جیاجیا ئەبێت لەھەندێ شوێندا و مەرج نیە ھەموو شوێنێك بگرێتەوە.
ڕوونیشی كردەوە، لە سنوری پارێزگای كەركوك و ناوچەكانی دیكەی ئیدارەی گەرمیان ئەگەری باران لاواز ئەبێت.
ئاماژەی بەوەشكرد، پلەكانی گەرما بەراورد بە ئەمڕۆ بەرێژەیەكی كەم 1 بۆ 2 پلە بەرزدەبنەوە.
