پۆلیسی پارێزگای سلێمانی دەستگیرکردنی تۆمەتبارێکی ڕاگەیاند، کە یەک ملیۆن و ٣٥٠ هەزار دینار و بڕی ٢٥٠ دۆلاری ئەمەریکی لە هاووڵاتییەک دزیبوو.
بەڕێوەبەرایەتی پۆلیسی پارێزگای سلێمانی ڕایگەیاند، مەفرەزەکانی نوسینگەی نەهێشتنی تاوانی كوردسات تۆمەتبارێکیان دەستگیرکرد، کە بڕی یەک ملیۆن و ٣٥٠ هەزار دینارو بڕی ٢٥٠ دۆلاری ئەمەریکی لە هاووڵاتییەک لەناو بەڕێوەبەرایەتی خانەنشینی سلێمانی دزیبوو.
ئاماژەی بەوەکرد، دوای ئەوەی هاووڵاتییەک سکاڵای تۆمار کرد کە بڕی یەک ملیۆن و ٣٥٠ هەزار دینارو ٢٥٠ دۆلاری ئەمەریکی لێدزراوە، دەستبەجێ هێزەکانی پۆلیس لێکۆڵینەوەکانیان دەستپێکرد و پاش وەرگرتنی بڕیاری دادوەر، توانرا لەماوەیەکی کەمدا تۆمەتبار بدۆزرێتەوە و لەلایەن مەفرەزەکانی نوسینگەی نەهێشتنی تاوانی کوردساتەوە دەستگیربکرێت.
ئەوەشی خستەڕوو، تۆمەتبار (أ، هـ، أ) لەدایکبووی ١٩٧٢ کە پێشینەی تاوانی هەیە، دانی بەتاوانەکەیدا ناوە، ئێستادا بە بڕیاری دادوەر و بەپێی ماددەی ٤٤٦ لە یاسای سزادان ڕاگیراوە و لێکۆڵینەوەکان بەردەوامە.
جەختی لەوەشکردەوە، هاووڵاتییان و خانەنشینان و مووچەخۆران دڵنیادەکەینەوە کە هێزەکانی پۆلیسی پارێزگای سلێمانی لە کاتی دابەشکردنی مووچەدا لە سەرجەم بانکەکان، ئامادەییان هەیە بە مەبەستی پاراستنی سەروماڵیان.
