کەشناسی پێشبینی دەکات لە دوای نیوەڕۆی ئەمڕۆوە تاوە باران و هەورە بروسکە زۆربەی ناوچەکانی هەرێمی کوردستان دەگرێتەوە و سبەینێش ناوبەناو لێزمە باران دەبارێت.
بەڕێوەبەرایەتی گشتی کەشناسی و بوومەلەرزەزانی هەرێمی کوردستان ڕایگەیاند، دوای نیوەڕۆی ئەمڕۆ تاوە باران و هەورە بروسکە دەستپێدەکات و لە زۆربەی ناوچەکاندا دەگۆڕێت بۆ لێزمە باران.
ڕوونیشیکردەوە کە مەوداى بینین 7-9 کیلۆمەتر دەبێت، بەڵام لەکات و شوێنی هەورە بروسکەدا کەمدەبێتەوە بۆ 5-6 کیلۆمەتر.
سەبارەت بە سبەینێ هەینیش، بەڕێوەبەرایەتی کەشناسی ڕایگەیاند، ئاسمان هەورى تەواو دەبێت و لێزمە باران و بروسکەی ناوبەناو لە سەرتاسەری هەرێمی کوردستان بەردەوام دەبێت.
ئەوەشی خستەڕوو کە ئەمڕۆ و سبەینێ گەرما 3-6 پلە نزم دەبێتەوە.
لای خۆشیەوە ئاراس جەبار، شارەزای کەشناسی ڕایگەیاند، لە ئێوارەی ھەینیەوە کاریگەری شەپۆلەکەی دەریای سوور و کەنداوی عەرەبی لەسەر ناوچەکانمان کەمدەبێتەوە، بەڵام لە ڕۆژی شەممەوە جارێکی دیکە ھەرێمی کوردستان دەکەوێتەوە ژێر کاریگەری نزمە پاڵەپەستۆیەکی نوێ کە ئەمجارە لە دەریای ناوەڕاستەوە ڕوودەکاتە ناوچەکە و کاریگەرییەکانی تا ئێوارەی سێشەمەی داهاتوو بەردەوام دەبێت.
