قائیمقامیەتی سلێمانی ڕایگەیاند، پێویستە لە هەموو فرۆشگە و کۆگایەکدا شوێنێکی تایبەت بە خۆراکی بەسەرچوو هەبێت و ئەگەر جیانەکرێنەوە، بە سەرپێچی هەژمار دەکرێت.
ئەمڕۆ پێنجشەممە، قائیمقامیەتی سلێمانی ڕایگەیاند، لەپێناو جیاکردنەوەی ئەو خۆراک و شەمەکە خراپ و بەسەرچووانەی لە فرۆشگە و کۆگاکاندا هەن، لیژنە هاوبەشەکان داوا دەکات شوێنی تایبەتیان بۆدروستبکرێت و لێی بنووسرێت بۆ فرۆشتن نییە.
جەمال محەمەد، سەرۆکی لیژنەی کۆگاکان ڕایگەیاند، لەم ڕووەوە لە هەموو سەردان و بەدواداچوونەکاندا ئاگاداریمان داوە بە کۆگا و فرۆشگەکان، بەشی زۆریان پابەند بوون.
وتیشی: پێویستە ئەو شوێنە جیاکراوەیە تەنها خۆراک و شمەکی ماوەبەسەرچوو و خراپبووی تێدا بێت و لێی نووسرابێت بۆ فرۆشتن نییە.
سەرۆکی لیژنەی کۆگاکان هۆشداری دایە خاوەنی مارکێت و فرۆشگە و کۆگاکان و جەختیکردەوە لەهەر شوێنێک خواردن و شمەکی خراپ و بەسەرچوو لەلایەن لیژنەکانەوە ببینرێت ئەگەر جیانەکرابێتەوە بە سەرپێچی هەژماردەکرێت.
ئەوەشی خستەڕوو، هەر فرۆشگە یان کۆگا و کارگەیەک ئەگەر شمەک و خواردنی ماوەبەسەرچووی هەبێت دەتوانێت لیژنە هاوبەشەکانی لێ ئاگاداربکاتەوە و تەواوی شمەک و خۆراکەکەی بۆ لەناودەبەن.
