شەپۆلی باران و هەورەبروسكە، كە پێشبینی دەكرێت زۆر بەهێز بێت و ببێتە هۆی ڕوودانی لافاو گەیشتە عێراق و شارەزایەكی كەشناسی دەڵێت: لە ئێوارەی سبەینێوە كاریگەرییەكەی دەگاتە هەرێم و ڕۆژی چوار شەممە زیاتر دەبێت و لە ڕۆژی هەینی لوتكەی كاریگەرییەكانی دەبێت.
ئاراس جەبار، شارەزای كەشناسی بۆ (خەڵك) ڕایگەیاند، سبەی سێ شەممە 30/4/2024 لە ئەنجامی کاریگەری ھەردوو نزمە پاڵەپەستۆی دەریای سوور و کەنداوی عەرەبی، ئاسمانی ھەرێمی کوردستان زۆربەی کاتەکان نیمچە ھەور ئەبێت و لەکاتەکانی ئێوارەدا ئەگەری چالاکبوونی ھەورە بروسکە و نمە بارانی کورت خایان ئەبێت لەزۆرێکی ناوچەکاندا.
ڕاشیگەیاند، لەھەندێ ناوچەی سنوری پارێزگای سلێمانی و ئیدارەی راپەرین تاوە بارانەکان بەخوڕ ئەبن و بای باشوری ڕۆژھەڵات کاتەکانی نێوان نیوەڕۆ بۆ ئێوارە مامناوەند بۆ چالاک ئەبێت بەخێرایی 10-25 کم لە كاتژمێرێكدا و پلەکانی گەرما بەراورد بە ئەمڕۆ لەسەرجەم ناوچەکاندا بەرێژەی 4 تا 5 پلە نزمدەبێتەوە.
ئاماژەی بەوەشكرد، دوو سبەی ڕۆژی چوار شەممە کاریگەری نزمە پاڵەستۆی کەنداوی عەرەبی و دەریای سوور لەسەر ناوچەکانمان زیاتر ئەبێت و بۆ ڕۆژی پێنج شەممە و بەتایبەت ڕۆژی ھەینی لوتکەی کاریگەریەکانی ئەبێت.
ڕوونیشی كردەوە، ئەگەری چالاکبوونی ھەورە بروسکەی بەھێز و تاوە بارانی بەخوڕ و تەرزە لە زۆربەی ناوچەکان ئەبێت.
