لەسەر ڕێگای كەلار بەرەو مەرزی پەروێزخان، دوو ئۆتۆمبێلی تایبەت و بارهەڵگر بەیەكدا دەدەن و بەهۆیەوە سێ كەس گیانیان لەدەستداوە، هاوكات لە ڕووداوێكی پێكدادانی 5 ئۆتۆمبێل هە هەولێر 5 كەس بریندار بوون.
بەڕێوەبەرایەتی هاتووچۆی گەرمیان بڵاویکردەوە، ئەمڕۆ دوو شەممە 29ی نیسان، بەهۆی پێکدادانی دوو ئۆتۆمبێلی جۆری (نیسان ئاڵتیما و مان بارهەڵگر) لەسەر کەلار – مەرزی پەروێزخان لە نزیک ناحیەی قۆرەتوو سێ کەس گیانیان لەدەستدا و کەسێکیش برینداربوو.
ڕاشیگەیاندووە، ئەو کەسانەی گیانیان لەدەستداوە سەرنشینی ئاڵتیماکەن و بریندارەکەش گەیەنراوەتە نەخۆشخانە.
جەختیشی كردۆتەوە، لێکۆڵینەوە لەلایەن تیمی هاتووچۆوە دەستی پێکردووە، بەمەبەستی زانینی هۆکار و چۆنیەتی ڕووداوەکە.
ئەمە لەكاتێكدایە، كە هەر ئەمڕۆ بەهۆی پێکدادانی پێنج ئۆتۆمبێل لە رێگەی قۆریتان لەنزیک مامزاوا لە هەولێر پێنج کەس برینداربوون.
بۆ بینینی ڤیدیۆی ڕووداوەكەی هەولێر كلیك لێرە بكە
