لە نووسراوێکدا کە وێنەیەکی دەست خەڵک- کەوتووە، ئەندامانی ئەنجوومەنی بازنە و ڕەیەڵەکانی بزوتنەوەی گۆڕان لە پارێزگای هەڵەبجە بەهۆی ململانێی ناوخۆییەوە دەستیان لەکار کێشایەوە.
لە نووسراوەکەدا ئاماژە بەوەکراوە، وەک ژمارەیەک لە ئەنجوومەنی بازنە و ڕایەڵەكانی مەکكۆی هەڵەبجە چەندین ساڵە بەدەست چەندین كێشە و گرفتی ناوخۆییەوە دەناڵێنن بۆ ئەومەبەستەش چەندین سكاڵامان تۆماركردووە و لەچاوەڕوانی یەكلایی كردنەوەی سكاڵاكاندا بووین، بەڵام گروپێكی ناوخۆیی مەکكۆی هەڵەبجە بڕیاریاندابوو كە ئەمڕۆ شەممە 27/4/2014 پرۆسەی هەڵبژادنی ناوخۆیی بۆ باژێروان ئەندامانی مەكکۆ لەناو بینای مەكکۆی هەڵەبجە بەڕێوەبچێت بەڵام نەکرا.
هەر لە نووسراوەکەدا ئەوەش خراوەتەروو، بەهۆی ناڕەزایی بوونمان بە ئەنجامدانی ئەو پرۆسەیە و گومانەکانمان لە هەبوونی پلانێک لەپشت ئەو کارەوە و دیاریکردنی هەڵبژێردراوان ناڕەزایەتیمان دەربڕی، بۆیە ئەو چەند كەسە بڕیاریاندا پرۆسەی هەڵبژاردنەكە بگوازنەوە بۆ گردی زەرگەتەی شاری سلێمانی و لەوێ پرۆسەی هەڵبژاردن بۆ مەكکۆی هەڵبجە بكرێت، ئەمەش یەكەمجارە كارێكی لەوشێوازە بەرێوەبچێت و ئێمەش ئەو پرۆسەیە ڕەتدەكەینەوە.
بەپێی نووسراوەکە، لەكۆی 54 ئەندامی ئەنجوومەن كە مافی دەنگدانیان هەبوو زیاتر لە 20 ئەندامیان بڕیاری دەستلەكاركێشانەوەیان لە ڕیزەكانی بزوتنەوەی گۆڕان داوە.
