کەشناسێک پیشبینی هاتنی شەپۆلێکی بارانبارین بۆ هەرێم لە هەفتەی داهاتووەوە ئاشکرا دەکات و ماوەی چەند ڕۆژێک دەخایەنێت.
ئاراس جەبار پسپۆڕی كەشوهەوا بە خەڵک-ی ڕاگەیاند: لەسەرەتای هەفتەی داهاتووەوە بە دیاریکراوی لە رۆژانی 29 و 30ی ئەم مانگە کاریگەری نزمەپاڵەپەستۆی دەریای سوور فراوان دەبێت بۆ سەر ناوچەکانی باشووری عێراق و پاشان پێشبینی دەكرێت لە 1/5 ناوچەکانی دیکەی عێراق و ھەرێمی کوردستان و وڵاتانی ناوچەکە بگرێتەوە.
ئاماژەی بەوەشدا، كاریگەری شەپۆڵە بارانبارینەكە ماوەی 5 تا 6 رۆژ لەسەر ناوچەکانمان دەمێنێتەوە و ناوبەناو ھەورە بروسکە و بارانی بەخوڕ و تەرزە بەرێژەی جیاواز لە کات و شوێنی جیاجیادا چالاک دەبێت.
ڕوونیشیکردەوە، لە ماوەی هاتنی شەپۆڵەكەدا پلەکانی گەرما نزمبوونەوە بەخۆیانەوە دەبینن و کەشێکی بەھارەیی و فێنک دەست پێ دەکاتەوە.
