بەڕێوەبەری بانكی خانەنشینی شارستانیی سلێمانی ڕایگەیاند، سەرقاڵی ئامادەكاریین بۆ هاوتاكردنی مووچەی خانەنشینانی هەرێم لەگەڵ بەغدا و كەمترین مووچەش 500 هەزار دینار دەبێت.
ژیان سابیر، بەڕێوەبەری بانكی خانەنشینی شارستانیی سلێمانی ڕایگەیاندووە، ”پێمان ڕاگەیەندراوە ئامادەكاریی بۆ هاوتاكردنی مووچەی خانەنشینانی هەرێم لەگەڵ بەغداد بكەین و تاوەكو درەنگان سەرقاڵی ئامادەكارییەكان دەبین، چونكە كارەكان زۆرە و لەكاتی جێبەجێكردنی بڕیارەكەدا ناتوانین فریای هەمووی بكەوین”.
ڕاشیگەیاندووە، ”تاوەكو ئێستا نازانین كەی ئەو بڕیارە جێبەجێ دەكرێت، بەڵام ئەو بڕیارە یارمەتییەكی زۆری خانەنشینان دەدات، چونكە لێرە نزیكەی 47 هەزار خانەنشینمان هەیە و زۆرێكیان 20 ساڵ خزمەتیان هەیە، بەڵام 220 هەزار وەردەگرن”.
دەشڵێت: ”بەپێی بڕیارەكە كەمترین مووچەی خانەنشینان دەبێت بە 500 هەزار لەگەڵ 100 هەزار دینار بۆ بەرزكردنەوەی ئاستی بژێوی خەرجدەكرێت و ئەو بڕیارەش دەبێتە هۆی باشتركردنی ژیانی خانەنشینانی هەرێم”.
وتيشى، “بۆ دیاریكردنی زۆرترین مووچەی خانەنشینی لەسەر بنەمای ساڵانی خزمەت و بڕوانامەكەی دیاری دەكرێت، كە ئەوەش لە خانەنشینێكەوە بۆ یەكێكی دیكە دەگۆڕیت”.
