شارەزایەكی كەشناسی پێشبینی هاتنی شەپۆلێكی باران بارین بۆ ناوچەكانی هەرێم دەكات لە 10 ڕۆژی سەرەتای مانگی داهاتوودا، كە لە 50 ساڵی ڕابردوودا لەو كاتەی ساڵدا وێنەی نەبووە و دەشڵێت: “سەرما دەستپێدەكاتەوە و لە بەشێكی ناوچەكان پێویستی بە گەرمكەرەوە هەیە”.
شاڵاو هیدایەت، شارەزای کەشناسی بۆ (خەڵك) ڕایگەیاند، ماوەیەکە شەپۆلێكی وشک و گەرم لەسەر ناوچەکانمان باڵادەستە و ئەوەش بۆ ئەمکاتەی ساڵ شتێکی نائاساییە و بەشێوازی بەرچاو پلەکانی گەرمای بەرز کردۆتەوە و لە ڕۆژانی داهاتوو پلەكانی گەرما زیاتریش بەرزدەبێتەوە ئەوەش نائاساییه بۆ ئەم کاتەی ساڵ و نیشانەی هاتنی شەپۆلێكی بارانبارینە.
دەشڵێت: “لە کۆتایی ئەم مانگەدا شەپۆلێکی زۆر باشی باران و هەورە بروسکە و تەرزه بەشێوەی گشتگیر ڕوو دەکاتە تەواوی ناوچەکانی هەرێم و گەرمیان پێشبینی لافاوی زۆری لێدەکرێت، کە ئەوەش دەگمەن دەبێت”.
ڕاشیگەیاند، پێشبینی دەکرێت لە ماوەی 50 ساڵی ڕابردوو بارانی بەوجۆرە لەو کاتەی ساڵدا بوونی نەبووبێت و لەسەرتاسەری وڵات پلەکانی گەرما دێتەوە خوار نۆڕماڵ و لەبەشێک ناوچەكان پێویستی بەگەرمکەرەوە دەبێتەوە و بەگشتی مانگی داهاتوو کەش فێنک دەبێت.
جەختیشی كردەوە، بەزۆری کاریگەری ئەو سیستەمە تەڕ و باراناویە دەکەوێتە مەودای 10 ڕۆژی سەرەتای مانگی ئایارەوە.
