سەرۆکی یەکێتی داوا لە حکومەتی هەرێمی کوردستان دەکات بە کردار خزمەتی قەڵادزێ و هاووڵاتییان بکات و دەڵێت: “ئەزموونەکەمان بەرهەمی گیانفیدایی ئەوانە و دەبێت هەموو هەوڵەکانیش بە ئاڕاستەی خزمەتکردنیان بێت”.
ئەمڕۆ چوارشەممە، بافڵ تاڵەبانی، سەرۆکی یەکێتیی نیشتمانیی کوردستان لە ساڵیادی بۆردومانکردنی قەڵادزێدا پەیامێکی بڵاوکردەوە و تێیدا هاتووە: “بەڕێزەوە یادی شەهیدانی بۆردومانی قەڵادزێی سەربەرز دەکەینەوە و سەری رێز و وەفاداری بۆ کەسوکارە خۆڕاگرەکەیان دادەنەوێنین”.
سەرۆکی یەکێتی دەڵێت: “خەڵکی خۆشەویستی قەڵادزێ نموونەی ئازایەتی و خۆڕاگرین، لە بەرامبەر بۆردومان و ڕاگواستندا نەک چۆکیان دانەدا، بەڵکو بە ئازایەتییەکی کوردانە و پێشمەرگانەوە بەگژ ڕژێمدا چوونە و مێژوویەکی تری پڕ لە شکۆمەندی و شانازییان بۆخۆیان تۆمارکرد”.
بافڵ تاڵەبانی ڕاشیگەیاند، “یەکێتیی نیشتمانیی کوردستان بەرامبەر خوێن و خۆڕاگریی خەڵکی خۆشەیستی قەڵادزێ و هەموو کوردستان وەفادارە و لە خەبات بۆ قەرەبووکردنەوە و خزمەتکردنیان بەردەوامدەبێت، بەرپرسیارێتیی حکومەتیشە بە کردار خزمەتی قەڵادزێییەکان و سەرجەم هاووڵاتییان بکات، چونکە ئەزموونەکەمان بەرهەمی گیانفیدایی ئەوانە و دەبێت هەموو هەوڵەکانیش بە ئاڕاستەی خزمەتکردنیان بێت”.
