دەیان ساڵە خزمەتی هونەری کوردی دەکات، ئێستا لە یاریگا و چایخانەکاندا دەهۆڵ لێدەدات.
فایەق داودە، هونەرمەندێکی دەنگخۆشێکی بنەماڵەی داودەیە لە کەرکوک، ئامۆزای سەڵاح داودەی هونەرمەندە.
ئەو هونەرمەندە لە لێدوانێکیدا بە (خەڵك)ی ڕاگەیاند، ئێستا بۆ دابینکردنی بژێوی ژیانی لە یاریگان و چایخانەکاندا گۆرانی دەڵێت و دەهۆڵ لێدەدات، هیچ مووچەیەکی نییە و وەک هونەرمەندێک ڕێزی پێویستیان لێنەنراوە.
بە کەوا و سەڵتەکەیەوە لەگەڵ دەهۆڵەکەی لە هەموو کەس دەیناسێتەوە، ئەگەرچی تێپەڕینی تەمەن لە ڕووخساریدا دیارە، بەڵام هێشتا دەهۆڵ لێدەرێکی باشە و جارجاریش گۆرانییەک دەڵێت.
یادگارییەکانی لەگەڵ سەڵاح داودەی هونەرمەند دەگێڕێتەوە، کە بەیەکەوە چوونەتە بەغدا و لە ڕادیۆی بەغدا گۆرانییان تۆمارکردووە.
“ئەوە دەیان ساڵە بەردەوامم لە هونەر و کۆڵم نەداوە، بەس بەداخەوە کەس یارمەتییەکم نادات، ئەوەتا تا ئێستا مووچەیەکم نییە”.
