سەرۆک وەزیرانی عێراق رایگەیاند، لەگەڵ سەرۆکی ئەمریکا گفتوگۆیان لەسەر رێککەوتنی ستراتیژی نێوان عێراق و ئەمریکا کرد و دەبێـت سەرجەم بەندەکانی چالاک بکرێت.
محەمەد شیاع سودانی، سەرۆک وەزیرانی عێراق ناوەڕۆکی کۆبوونەوەکەی لەگەڵ سەرۆکی ئەمریکا ئاشکرا کرد و وتی، “لە ئەمریکا کارمان لەسەر چەندین دۆسیەی گرنگ کرد لەوانە کەرتی وزە و غاز و بەکارهێنانی بۆ بواری کارەبا”.
راشیگەیاند، لەکۆبوونەوەماندا لەگەڵ وەزارەتی خەزێنەی ئەمریکا باسمان لە بانکە سزادراوەکان کردووە و لیژنەیەکی هاوبەشمان پێکھێناوە بۆ چارەسەر کردنی کێشەکە و وەزارەتی خەزێنەی ئەمریکا جەختی لەوەکردەوە کە کەرتی بانکی و بانکەکان لە عێراق گەشەیان کردووە”.
سەرۆکوەزیرانی عێراق دەشڵێت:” پێویستمان بە ئەمریکا هەیە لەهەموو کەرتە جیاوازەکاندا، چونکە ئەمریکا وڵاتێکی پێشکەوتووە”.
باسی لەوەشکرد، “ئێمە دەتوانین لەیەک کاتدا پەیوەندیمان لەگەڵ ئەمریکا و ئێراندا هەبێت و رۆڵمان هەبێت لە کەمکردنەوەی گرژییەکانی نێوانیان و عێراق توانیویەتی رۆڵی باش ببینێت لە نزیککردنەوەی ئێران و وڵاتانی دیکەی کەنداو”.
ئاماژەی بەوەشکرد:” عێراقییەکان پێکەوە بەسەر تیرۆردا سەرکەوتن لە کاتی سەردانەکەی رەجەب تەیب ئەردۆغان سەرۆکی تورکیا باس لە کێشەی ئاو دەکەین و ڕێگەش نادین عێراق ببێتە سەرچاوەی کێشە بۆ تورکیا”
سەرۆکوەزیرانی عێراق راشیگەیاند، لە سایەی ئێمەدا پەیوەندییەکانی ئێران و سعودیە زۆر باشن
