تەندروستی سلێمانی ئاماری مانگی ڕابردووی لەدایكبوونی منداڵانی بڵاوكردەوە، كە 832 منداڵ لەدایكبوون و زۆرینەیان بە نەشتەرگەری بوون.
بە پێی ئامارێكی بەڕێوەبەرایەتی تەندروستی سلێمانی، مانگی ڕابردوو هەزار و 830 نەخۆش سەردانی نەخۆشخانەی منداڵبوونی فریاكەوتنی فێركاری سلێمانییان كردووە و هەزار و 378 نەخۆش داخڵ كراون.
ئاشكراشی كردووە، لەو ڕێژە منداڵەی لەدایكبوون 417 منداڵیان كوڕ بوون و 415 منداڵیان كچ بوون، هەروەها 325 منداڵ بە شێوەی سروشتی لەدایكبوون و 507ـیان بە نەشتەرگەری لەدایكبوون.
هەر بەپێی ئامارەكە، لە مانگی رابردوودا لە نەخۆشخانەكە 134 منداڵ لە بەشی نەبەكام داخڵ كراون و 11 حاڵەتی لەدایكبوونی دووانە و حاڵەتێكی لە دایكبوونی سیانە هەبووە، هەروەها 110 لەبارچوونی منداڵ تۆمار كراوە و هەزار و 16 سۆنەریش گیراوە.
ئەمە لەكاتێكدایە، كە مانگی دووی ئەمساڵدا 943 منداڵ لە شاری سلێمانی لەدایك بوون و ڕێژەی منداڵبوونی سروشتی بەرزتر بوو لە نەشتەرگەری، بەڵام لەمانگی سێ-دا وەك لە ئامارەكەدا دیارە ڕێژەی منداڵ بوون بە نەشتەرگەری زیاتر بووە.
