لیژنەی باڵای هەڵبژاردن لە تورکیا، پۆستی هاوسەرۆکایەتی شارەوانی وانی لە کاندیدەکەی ئاکەپە سەندەوە و دای بە عەبدوڵا زەیدان کاندیدی سەرکەوتووی دەم پارتی.
دوێنێ لە کاتێکدا عەبدوڵا زەیدان کاندیدی پارتی یەکسانی و دیموکراسیی گەلان (دەم پارتی) لە وان، زۆرترین دەنگی لە هەڵبژاردنەکانی شارەوانی ئەو شارەدا بەدەستهێنا، بەڵام پۆستی سەرۆکی شارەوانی وانی لێ زەوت کرا و درا بە کاندیدی ئاکەپە، ئەمەش ناڕەزایەتی و خۆپیشاندانی گەورە و توندی بەدوای خۆیدا هێنا.
دوای ئەو فشارە زۆرەی خۆپیشاندەران لەماوەی ئەم دووڕۆژەدا، ئەمشەو بە ناچاری، لیژنەی باڵای هەڵبژاردن، پۆستی هاوسەرۆکایەتی شارەوانی وانی لە کاندیدەکەی ئاکەپە وەرگرتەوە و دای بە عەبدوڵا زەیدان کاندیدی سەرکەوتووی دەم پارتی.
شایەنی باسە هەڵبژاردنی شارەوانییەکانی تورکیا لەسەرجەم پارێزگاکانی ئەو وڵاتە بەڕێوەچوو، تێیدا پارتەکەی ئەردۆغان پاشەکشەیەکی بەرچاوی لەو هەڵبژاردنەدا بەخۆیەوە بینی، و ئەردۆغانیش دوای ڕاگەیاندنی ئەنجامەکان ڕایگەیاند، ئەنجامەکان بەدڵی ئێمە نییە بەڵام قبوڵی دەکەین.
