دوو شەپۆلی بەهێزی باران بارین و تەرزە ناوچەكانی هەرێمی كوردستان دەگرنەوە و لە چەند ناوچەیەك 100 ملم باران دەبارێت و شارەزایەكی كەشناسی هۆشداری ڕوودانی لافاو دەدات.
ئاراس جەبار، شارەزای كەشناسی بۆ (خەڵك) ڕایگەیاند، کاریگەری نزمەپاڵەپەستۆی دەریای سوور و کەنداوی عەرەبی لەشەودا کاریگەری بەھێزدەبێت تا بەرەبەیانی سبەی دوو شەممە 25/3/2024 و لەم حاڵەتەدا لوتکەی باران و چری شەپۆلەکە زیاتر لەسەر ناوچەکانی باشوری گەرمیان و ناوچە سنورییەکانی خۆرھەڵاتی گەرمیان و شارەکانی ڕۆژھەڵاتی بەغدادە.
وتیشی، “دووبارە ھۆشداری لە بارانی بەخوڕ و لافاو ئەدەین و بارینی تەرزەی زۆر و دروستبوونی بارستە ھەوری سوپەرسێل و ڕێژەی بارانی پێشبینی کراو لە کاتەکانی ئێوارەی ئەمڕۆ بۆ سبەی لەناوچەکانی باشوور و ناوەراستی گەرمیان 40 تا 100 ملم زیاتر و ناوچەکانی باکوری گەرمیان و سنوری پارێزگای ھەڵەبجە 30 تا 60 ملم دەبێت”.
ڕوونیشی كردۆتەوە، پارێزگای سلێمانی، کە بەگشتی ناوچەکانی باکوری ڕۆژھەڵات و ڕۆژھەڵاتی باران و تەرزەی زیاتر ئەبێت بەراورد بە ڕۆژئاوای پارێزگاکە 20 تا ملم 60 دەبێت.
ئاراس جەبار پێشبینیشی كردووە، “کاریگەری ئەم ناسەقامگیر سبەی دوو شەممە لەکاتەکانی بەیانی زوودا لەناوچەکانی ئیدارەی گەرمیان ناوچەکانی ناوەڕاست و ڕۆژئاوای ھەرێم کۆتایی پێدێت و لە سنوری پارێزگای سلێمانی و ھەڵەبجە بەگشتی ڕۆژھەڵاتی ھەرێم کاتەکانی نیوەڕۆ کۆتایی پێدێت و کەش سەقامگیر ئەبێتەوە”.
ئاشكراشی كردووە، ڕۆژی سێ شەممەش 26/3/2024 شەپۆلێکی دیکە لە تورکیاوە بۆ سەر ناوچەکانمان دەستپێدەکاتەوە و ماوەکەی کەم ئەبێت و زیاتریش ناوچە شاخاوییەکانی باکووری ھەرێم ئەگرێتەوە.
