بەفر نیویۆركی ماندوو كردووە

فەرمانڕەوای نیویۆرك ڕایگەیاند، ویلایەتی نیویۆرك لە ئەمریكا ڕووبەڕووی بەهێزترین شەپۆلی بەفربارین لە مێژوودا بووەتەوە كە هەڕەشەی بۆ ژیان دروستكردووە.

ئەو شەپۆلەی نیویۆركی گرتووەتەوە، هاوكاتی شەپۆلێكی گشتگیری سەرماوسۆڵە و با، دابەزینی زۆری پلەكانی گەرمایە لە ئەمریكا.

بەهۆی ئەو شەپۆلی بەفربارینەوە و ڕووداوەكانی هاتووچۆوە بەلایەنی كەمەوە 16 كەس گیانیان لە دەستداوە.

فەرمانڕەوای نیویۆرك دەڵێت: فڕۆكەخانەی پوڤالو نیاگرای نێودەوڵەتی تا بەرەبەیانی ڕۆژی دوو شەممە دادەخرێت، هاوكات بەشێك لە ڕێگاوبانەكان لە ڕۆژانی جەژنی سەری ساڵدا دادەخرێن.

وزەی كارەبا لە 800 هەزار كەس بڕاوە و 1.8 ملیۆن ماڵیش كارەباكەیان كەمیكردووە.

فشاری زۆریش لەسەر سیستمی وزە لە سەرانسەری ئەمریكادا دروستبووە، لەگەڵ بەرزبوونەوەی خواست لەسەری و زیانگەیاندن بە هێڵەكانی كارەبا.

ئەمڕۆ نزیكەی 2700 گەشتی ئاسمانی ئەمریكا هەڵوەشێندراونەتەوە و زیاد لە 6200 گەشتیش دواخراون و دوێنێش 5936 گەشتی دیكە هەڵوەشێندراونەتەوە.