پلانی ئۆپیک پڵەس بۆ کەمکردنەوەی بەرهەمهێنان و هێرشەکانی ئۆکراینا بۆ سەر دامەزراوەکانی نەوتی ڕووسیا، نرخی نەوتیان لە جیهاندا بەرز کردەوە.
ئەمڕۆ سێشەممە، نرخی بەرمیلێک نەوتی خاوی برێنت لە بازاڕەکانی جیهاندا بە 86 دۆلار و 69 سەنتەوە مامەڵەی پێوە دەکرێت و لە ماوەی دوو ڕۆژی ڕابردوودا نزیکەی دوو دۆلار بەرز بووەوە.
هاوکات نرخی بەرمیلێک نەوتی خاوی ئەمریکیش گەیشتە 82 دۆلار و 56 سەنت.
لە مانگی تشرینی یەکەمی ڕابردووەوە ئەمە یەکەمجارە نرخی نەوت بەو شێوەیە بەرز بێتەوە و هۆکارەکەشی دەگەڕێتەوە بۆ بەردەوامبوونی سەرنجی وڵاتانی ئۆپیک پڵەس لەسەر کەمکردنەوەی بەرهەمهێنان و ئەو هێرشانەی کە ئۆکراینا لە ڕێی درۆنەوە دەیانکاتە سەر دامەزراوەکانی نەوتی ڕووسیا.
