کەشناسی هەرێمی کوردستان ڕایگەیاند، بە هۆی یەکگرتنی دوو نزمە پاڵە پەستۆی دەریای ناوەڕاست و دەریای سوور، شەپۆلێکی بارانبارین هەرێم دەگرێتەوە.
بەڕێوەبەرایەتی گشتی کەشناسی و بوومەلەرزەزانی هەرێمی کوردستان ڕایگەیاند، ئەمڕۆ یەکشەممە، ئاسمان لەنێوان ساماڵ و پەڵە هەور دەبێت و لە ئێوارەدا دەگۆڕێت بۆ نیمچە هەور، پلەی گەرماش کەمێک بەرز دەبێتەوە.
سەبارەت بە سبەینێ دووشەممەش ڕایگەیاند، ئاسمان نیمچە هەور و هەوری تەواو دەبێت لەگەڵ دەستپێکردنی باران بارین لەکاتەکانی بەیانی زوودا.
ڕوونیشێکردەوە کە لە ئەنجامی هاتنی شەپۆلێکی بارانبارین لەسەر ناوچەکەمان، پێشبینی نمە باران و بارانی مامناوەند دەکرێت لەناوچە جیاکانی هەرێمی کوردستان.
بەڕێوەبەرایەتی کەشناسی هەرێم ئەوەشی خستەڕوو کە درەنگانی شەوی دووشەممە کاریگەری ئەم شەپۆلە زیاد دەکات، ئەویش دوای یەکگرتنی هەردوو نزمە پاڵە پەستۆی دەریای ناوەڕاست و دەریای سوور .
بەرزترین پلەکانی گەرمای پێشبینیکراو بە پلەی سیلیزی
هەولێر : 16
سلێمانی :17
دهۆک : 15
زاخۆ : 16
هەڵەبجە : 16
کەرکووک : 18
سۆران : 14
حاجی ئۆمەران : 7
گەرمیان : 21
